Për më shumë se 4 orë disa zona në Tiranë kanë pasur mungesë të energjisë elektrike.
E nëse një ditë më parë OSHEE njoftoi se në disa zona do të ndërhyhej për remonte në rrjetin elektrik dhe dihej mungesa e saj, në zonën e rrugës Myslym Shyri, pati një ndërprerje energjie prej orës 08:30 deri në 12:30.
Mungesa e energjisë, sipas OSHEE, kishte të bënte me dëmtimin e një kablli elektrik, në një nga rrugicat pranë tregut çam.
Dhe dëmtuesi i kabllit ishte pikërisht Bashkia e Tiranës e drejtuar nga Erjon Veliaj. Punimet për rikonstruksionin e një shkolle dhe ndërhyrjet joprofesionale, përfshirë edhe mungesën e hartave që tregojnë kalimin e kabllove elektrikë nën tokë, kanë bërë që punëtorët e kontraktuar nga bashkia, të këpusnin kabllin elektrik që furnizon një pjesë të konsiderueshme të një prej zonave qendrore të Tiranës.
Për më shumë se 4 orë qytetarët që kanë banesat apo bizneset e tyre në këtë zonë kanë vuajtur mungesën e energjisë elektrike.
Fotot e mëposhtme tregojnë atë se çfarë ka ndodhur dhe shkakun sepse një prej zonave më qendrore të kryqytetit vuajti mungesën e energjisë.
Ndërkohë OSHEE ka reaguar lidhur me ndërprerjen e energjisë elektrike.
“Një pjesë e zonës rreth “Myslym Shyri” dhe “Rruga e Kavajës” kanë mbetur pa energji elektrike për shkak të demtimit të fiderit 20kV nga subjekti privat që punon për rikonstruksionin e shkollës “Konferenca e Pezës”.
OSHEE mori masa për riparimin e dëmit, në prani edhe të policise së shtetit, e cila regjistroi procedimin ndaj subjektit.
Aktualisht ka marë energji një pjesë e konsiderueshme e abonenteve”, thuhet në njoftimin e OSHEE.
