Opozita do të vazhdojë protestat, pasi nuk ka rrugë tjetër për rrëzimin e Edi Ramës nga posti i Kryeministrit.
Çlirim Gjata, sekretar për Çështjet Ligjore në PD, theksoi se me ardhjen e shtatorit do të rikthehen protestat, që përbëjnë një nga elementët e strategjisë së opozitës për rrëzimin e Ramës.
“Nuk ka rrugë tjetër, duhet të përballemi me të keqen”, tha Gjata, duke shtuar se nuk ka rrugë tjetër për vendosjen e shtetit ligjor pa rrëzimin e Ramës.
Gjata tha se opozita është më e bashkuar se kurrë, edhe për faktin se e keqja që kemi përballë është Edi Rama.
“Opozita është e bashkuar dhe e ka të qartë se pa rrëzuar Ramën nuk mund të flitet as për zgjedhje, as për dialog, as për shtet ligjor”, tha Gjata.
I pyetur lidhur me zgjidhjen e krizës politike në vend, Gjata tha se opozita nuk e ka kërkuar zgjidhjen te ndërkombëtarët, port e qytetarët shqiptarë.
“DASH e ka cilësuar Shqipërinë narko-shtet, shikoni raportet e tjera të ndërkombëtarëve që evidentojnë ato probleme që janë denoncuar prej kohësh nga opozita. Shikoni sot ndërkombëtarët, përfaqësuesit e selive diplomatike që shkojnë te Teatri, atje ku Rama tenton të pastrojë 200 mln euro para të drogës përmes një projekti”, tha Gjata.
