Po pritet me padurim sezoni i dytë i Hell’s Kitchen në Top Channel pasi vitin e kaluar shikueshmëria ishte shumë e lartë dhe popullariteti i këtij formati veçse rritet teksa vazhdon të jetë pjesë e videove funny dhe meme-ve që qarkullojnë në internet. Arsyen kryesore të suksesit, shumica e ndjekësve e ‘faturojnë’ tek shefi i kuzhinës, Renato Mekolli i cili diti të ishte në rol siç duhet.
Për të treguar më tepër detaje për sezonin e dytë, Renato ishte sot i ftuari i gazetares Suada Daci në “Klubin e Mëngjesit” në Club Fm, ku rrëfeu jo pak detaje.
Fillimisht shefi i kuzhinës foli më tepër rreth përzgjedhjes së autores së programit, Zefina Hasanit e cila me këtë projekt rikthehet në Top Channel pas disa vitesh. Sipas Renatos, ndonëse u përmendën emra të shumtë, Zefina për të e kishte eksperiencën dhe nuhatjen e duhur ndaj nuk do ta ndërronte me asnjë personin që është në krahun e tij të djathtë në Hell’s Kitchen 2. Mekolli shtoi se nuk është e lehtë për të përballuar një format të tillë ndaj duhet që në detyra organizative të qëndrojnë njerëz shumë të zotë.
“Hell’s Kitchen është programi më i kushtueshëm jo vetëm në Top Channel por jam i sigurtë edhe në televizonet e tjera paralele, ndaj ka shumë përgjegjësi” – është shprehur ndër të tjera Renato për Suada Dacin.
Kur kjo e fundit e pyeti nëse Hell’s Kitchen këtë vit do të jetë si Big Brother, Renato konfirmoi duke shtuar se elementi i “reality show-t” është shumë i rëndësishëm. “Është gati shtëpia dhe kuzhina e re, do të ketë një dhomë të re rrëfimi sigurisht dhe unë do të kem një zyrë timen ku do t’i monitoroj nga larg. Jeta e tyre do të jetë kuzhina sepse edhe debatet mbi kuzhinën do të jenë por sigurisht do të kenë mundësi që në shtëpi të mund të njihen edhe më mirë me njëri tjetrin” – u shpreh Mekolli për Klubin e Mëngjesit.
Nga ana tjetër, moderatorja e emsionit, Suada, e ngacmoi lidhur me lajmin që qarkulloi në media se një vajzë brune dhe një bjonde do ta shoqëronin shef Renaton gjatë programit. Lidhur me këtë, ai u shpreh se do të jenë dy vajza të talentuara të cilat ne i njohim dhe ai i ka besuar edhe në restorantin e tij. Ato do të kenë rolin e zëvendëses së shefit.
Teksa shef Renato po fliste rreth kësaj, një shkëndijë na bën ne të News31.al të mendojmë se ndoshta njëra prej vajzave do të jetë Ani, konkurrentja e vitit të kaluar e cila punon në restorantin e shef Renatos momentalisht dha ka qenë ndër më të preferuarat e shefit sezonin e kaluar, fakt që Renato e shprehu edhe për Dojna Memën në Pop Culture javë më parë.
Për t’jua rikujtuar, Ani është kjo;
Ndërkohë tërësisht në formë surprize, Renato rrëfeu edhe një projekt tjetër mediatik që do t’i pëlqente.
”Dua një emision radiofonik dy herë në javë. Dua që të jetë në mëngjes sepse kam restorantin prioritet, dhe në vere të jetë pushim. Pra kushdo që është i interesuar le të më kontaktojë…” – tha Renato duke e mbyllur me këtë ide interesante intervistën e tij për “Klubin e Mëngjesit”. /News31.al
