Zjarri që shpërtheu të shtunën në ishullin Elafonisos vijon, ndërsa një front i dytë i flakëve u shfaq të dielën.
Për shkak të situatës së rënduar, Sekretari i Përgjithshëm për Mbrojtjen Civile, Nikos Hardalias, së bashku me një njësi speciale për menaxhimin e katastrofave u nisën drejt ishullit.
Sipas raporteve të televizionit publik (ERT), zjarri i është ofruar disa shtëpive dhe kampeve të plazhit në Simos, ndërsa banorët dhe tursitët janë evakuuar për herë të dytë. Zona e Panagjisë gjithashtu është evakuuar.
Në ishull po fryjnë erëra të forta, duke e bërë të vështirë shuarjen e zjarrit, ndërsa forcat tokësore që luftojnë flakët po rriten.
Aktualisht, 90 zjarrfikës po veprojnë me 19 automjete, tre avionë Canadair, tre aeroplanë PZL dhe katër helikopterë. Në operacion janë angazhuar edhe disa vullnetarë.
Zonat e Panagjisë dhe Simos janë evakuuar, dhe sipas Zëvendësguvernatorit të Laconia, Adamantia Tzanetea, nuk ka njerëz të plagosur ose të bllokuar në flakë.
Tzanetea tha se një numër i madh vizitorësh janë në port duke pritur të largohen nga ishulli dhe shprehu shqetësimin se zjarri jo vetëm që ka shkaktuar dëme të mëdha mjedisore por edhe dëme ekonomike në ishull.