Francesco Becchetti është shprehur i kënaqur për vendimin e gjykatës londineze që ai të mos ekstradohet në Shqipëri ndërsa ka theksuar se do të vijojë luftën ligjore me shtetin shqiptar për të dëmin ekonomik që i ka shkaktuar.
Vendimi për mosekstradimin e tij u mor nga një gjykatë në Londër tri ditë më parë.
Becchetti është pronar i ekipit të futbollit Leyton Orient në Britani, ndërsa në vendin tonë akuzohet për mashtrim, falsifikim dhe pastrim parash. Pas këtij vendimi, avokatët e shtetit shqiptar kanë 14 ditë për të apeluar vendimin.
“Jam i gëzuar me këtë vendim dhe mirënjohës për konsideratën e kujdesshme ndaj çështjes nga ana e gjyqtares”, ka thënë Becchetti përmes një komunikate për mediat.
Sipas biznesmenit italian ndjekja e tij penale në Shqipëri bëhet për arsye politike, duke paralajmëruar se do të vazhdojë përballjen me shtetin shqiptar në rrugë ligjore për dëmet që u ka shkaktuar bizneseve të tij.
“Gjykatësja zbuloi se Shqipëria po mashtronte gjykatën britanike dhe po abuzonte me procesin e ekstradimit. Vendimi i gjykatës tregoi, siç kam thënë edhe më parë, se procedimi penal ndaj meje në Shqipëri është i motivuar politikisht”.
“Do të vazhdoj të përballem me qeverinë shqiptare për dëmin e madh që i ka shkaktuar bizneseve të mia dhe qindra njerëzve që punojnë për mua dhe familjeve të tyre”, është shprehur ish-pronari i Agon Channel.
