Pas 9 vitesh të mbushura me tituj, trofe dhe suksese, por edhe një sezon të fundit ku u gradua si kapiten, rrugët e Skënderbeut dhe të Marko Radasit duket se do të ndahen zyrtarisht.
Kroati ditën e djeshme ka pasur takime të gjata me dy klube kroate për të vendosur të ardhmen dhe me shume mundësi pritet t’i thotë zyrtarisht lamtumirë Skënderbeut. Burime të konfirmuara pranë futbollistit bëjnë me dije se pritja prej gati 3 muajsh për të gjetur një akord rinovimi me Skënderbeun e ka lodhur mbrojtësin kroat që ka vendosur të shohë dhe alternativat e tjera.
Marko Radas në bisedime prej kohësh edhe me klube të tjera siç ishte rasti i Tiranës duket se ka vendosur të qëndrojë këtë sezon pranë familjes. Për momentin nuk ka asgjë zyrtare, por pak mbetet që të bëhet i tillë edhe largimi i Radasit nga Skënderbeu, teksa për momentin kanë shfaqur interes dy klube njëra në Kategorinë e Parë kroate dhe tjetra ekip i Superligës së Kroacisë.
/Panorama Sport/
