Një terapi e re që po testohej në laborator, ku qelizat e bardha të gjakut riprogramohen për të sulmuar qelizat kancerogjene, çoi në vdekjen e tre pacientëve. Për pasojë, autoritetet amerikane kanë urdhëruar ndalimin e përkohshëm të testimeve.
Kjo terapi, e quajtur JCAR015, përdor qeliza imune të programuara gjenetikisht, të njohura si CAR–T për të trajtuar acute lymphoblastic leukemia (ALL) tek të rritur, një kancer i sistemit imuntar.
Në një studim të realizuar në fillim të këtij viti, 94 përqind e pacientëve teminalë, që u trajtuan me këtë teknikë, patën rezultate pozitive.
Bëhet fjalë për një teknikë të re tepër premtuese në luftën kundër kancerit, por tashmë humbja e tre jetëve bën që ajo të ndalojë dhe të mos testohet më tej.
Pacientët ishin të tre nën 25 vjeç dhe vdiqën gjatë fazës së dytë të trajtimit, në momentin kur qelizat e programuara po godisnin ato të bardha.
Shkaku, siç shkruan portali “Gizmodo”, ishte akumulimi i lëngjeve të tepërta në trurin e pacientëve. Në të gjitha rastet, vdekja erdhi pasi pacientët kishin përdorur ilaçin e kemioterapisë fludarabine, ndërkohë që i nënshtroheshin trajtimit.
