“Vija e kuqe nuk është bërë nga peneli im, por nga SHBA-ja dhe BE-ja,” deklaroi sot Kryeministri Edi Rama pas mbledhjes me Grupin Parlamentar të PS-së.
I pyetur për propozimin e fundit ardhur nga SHBA-ja për t’i dhënë rrugë, Reformës në Drejtësi, Rama tha: “Dua t’ju them vetëm kaq: kjo është një reformë historike dhe me rëndësi strategjike për të nesërmen e vendit tonë. Nuk është reforma e një pale, por është reforma e një vendi që synon të bëhet anëtar i denjë i Bashkimit Europian dhe nuk mund të jetë kurrë një negociator i besueshëm në sytë e Bashkimit Europian nëse nuk hedh themelet e një sistemi të ri drejtësie.
Ndërsa përsa i përket vijave, ju siguroj se unë i njoh shumë mirë ngjyrat dhe ndërkohë – siç e kam thënë dhe e përsëris – vija e kuqe nuk është bërë nga peneli im, por është një vijë e kuqe që është përcaktuar nga Shtetet e Bashkuara dhe Bashkimi Europian dhe që ka në esencën e vet, procesin e Vetingut.
E kam thënë dhe e përsëris se tek ne nuk ka qënë asnjëhërë problemi sesi parlamenti do të votojë pasi kemi ndryshuar 2/3, kemi rënë dakord për çdo qasje që garanton pjesëmarrjen e opozitës bazuar dhe në rekomandimet e Komisionit të Venecias, por thelbi, mësojeni, është jo se kush do të mbushë me ujë shishet, por sesa i pastër do të jetë burimi prej nga vjen uji. Që do të thotë si do të garantojmë që filtri i kandidaturave që pastaj i shkojnë parlamentit, të jetë i sigurtë. Dhe nëse filtri është i sigurtë, për ne nuk ka asnjë problem tjetër.
Po e përsëris dhe njëhërë tjetër: Partia Socialiste dhe shumica qeverisëse do të votojnë një reform që ka mbështetjen e plotë të SHBA-së dhe të BE-së. Të jeni të sigurtë dhe mbi të gjitha të jenë të Të sigurtë të gjithë shqiptarët se as SHBA-ja dhe as BE-ja nuk bëjnë asgjë që cenon thelbin e kësaj reforme. Formula e propozuar akomodon plotësisht një kërkesë të përsëritur dhe të stërpërsëritur papushim të PD-së dhe unë habiten sesi Partia Demokratike nuk po thotë “Po” e lumtur,” përfundoi Rama.
