Një 24 vjeçar nga Tirana ka goditur me grushta dhe shqelma ish të dashurën e tij në Laprakë pasi kjo e fundit nuk pranonte të ribashkohej. Edhe pse çifti kishte gjashtë muaj që ishin ndarë, djali vazhdonte ta përndiqte dhe të bëhej xheloz për sit ë dashurën.
Pasi, i kishte kërkuar prej disa javësh që t’i rikthehej lidhjes me të dhe ishte refuzuar nga vajza, ai sërish nuk hiqte dore, duke vëzhguar çdo veprim të saj, duke i telefonuar e pritur poshtë shtëpisë.
Veprime që kishin marrë përmasat e përndjekjes, por vajza me iniciale R.Ç., 22 vjeçe, kishte ngurruar që ta denoncojë. Xhelozia e Jonader Bamit, tashmë i arrestuar, ka arritur kulmin mbrëmjen e së shtunës, kur në qendër të Laprakës, ka ndaluar me forcë nga krahu në rrugë ish¬të dashurën e tij.
Pas refuzimit të vajzës për të biseduar me të, 24¬-vjeçari ka nisur ta fyejë e ta kërcënojë. Në fund e ka goditur me grushte e shqelma, duke e shtrirë në trotuar, në sytë e dhjetëra dëshmitarëve.
Burime nga Policia thanë se janë lajmëruar për ngjarjen nga kalimtarët e rastit, disa prej të cilëve kishin ndërhyrë për t’i nxjerrë nga duart 22¬-vjeçaren që po dhunohej barbarisht. Drejt vendngjarjes janë nisur menjëherë shërbimet e Komisariatit nr.3, që kanë bërë të mundur arrestimin në flagrancë të shtetasit Jonader Bami.
Ai i kishte marrë me forcë edhe celularin e markës “LG” 22¬ vjeçares dhe nuk pranonte t’ia jepte pa lexuar mesazhet. Burime nga Policia thanë se edhe në prezencë të forcave të rendit, madje edhe me pranga në duar, ai sërish e kërcënonte vajzën duke refuzuar t’i japë telefonin.
Menjëherë pas arrestimit të autorit të sulmit, 22-¬vjeçarja është transportuar për ndihmë mjekësore në spital, ku i është marrë edhe një deklarim për ngjarjen. Burimet thanë se është kërkuar edhe prezenca e një psikologeje, pasi gjendja e saj ishte e rënduar.
Madje, fillimisht, ajo nuk donte që të bënte denoncim për ngjarjen, pasi kishte frikë nga ish¬i dashuri. Në fund ka pranuar ta kallëzojë, duke treguar se kjo ishte hera e parë që ai e dhunonte në këtë formë, por edhe më përpara e kishte fyer, kërcënuar dhe përndjekur e në disa raste e kishte qëlluar me shpullë.
Kjo kishte qenë edhe arsyeja pse ajo kishte vendosur të ndahej me të, ndërsa ai behej xheloz, pasi dyshonte se vajza mund të kishte lidhje me ndonjë djalë tjetër. Panorama.al
