Zbardhen 5 vjedhje marketesh dhe minimarketesh, të ndodhura gjatë muajve të fundit në plazhin e Golemit.
Policia ka finalizuar operacionin policor “Shëtitësi”, i cili çoi në pranga një 18-vjeçar, të dënuar më parë për vjedhje.
“Në vijim të punës për parandalimin e vjedhjeve, zbardhjen e atyre të ndodhura më parë, kapjen dhe arrestimin e autorëve, shërbimet e Policisë të Komisariatit Kavajë, nën drejtimin e Prokurorisë, pas një pune të bërë me metoda speciale të hetimit, organizuar dhe finalizuan operacionin “Shëtitësi”, ku u bë e mundur zbardhja e 5 rasteve të vjedhjes së marketeve dhe minimarketeve në zonën e plazhit të Golemit në Kavajë.
Si rezultat i operacionit u bë kapja dhe arrestimi në flagrancë i shtetasit: A. L, 18 vjeç, banues në Shijak, i dënuar më parë për vjedhje.
Nga veprimet hetimore të kryera dyshohet se ky shtetas gjatë muajve të fundit në plazhin e Golemit ka vjedhur në 4 markete dhe 1 minimarket, vlera monetare, mallra ushqimorë dhe pije alkoolike e freskuese.
Materialet procedurale do t’i referohen Prokurorisë për veprime të mëtejshme”, thuhet në njoftimin e policisë.
