Nënkryetari i Bashkisë së Kamzës, Vendim Demaj, ka reaguar lidhur me vendosjen e një sasie lënde eksplozive në banesën e tij, fatmirësisht pa shkaktuar dëme në njerëz.
Në reagimin e tij Demaj thotë se nuk ka konflikte me askënd, përveç Kryeministrit Edi Rama dhe ministrit të Brendshëm, Sandër Lleshaj, që i ka denoncuar për veprimet e tyre arbitrare dhe anti-ligjore.
Në këtë mënyrë, Demaj ka përgënjeshtruar edhe variantin e nxjerrë së fundmi nga policia, sipas të cilës, shpërthimi nuk ka ndodhur në pallatin ku jeton Demaj.
Policia thotë se lënda plasëse i ishte vendosur banesës së qytetarit Paulin Gjegjaj.
Por duket se ky reagim i policisë është hedhur poshtë nga nënkryetari i Bashkisë së Kamzës, i cili konfirmoi ngjarjen e rëndë.
Më herët PD denoncoi shpërthimin në derën e banesës së Vendim demajt, që mban postin e nënkryetarit të Bashkisë së Kamzës.
