Turistë të shumtë shqiptarë që kanë qenë verën e fundit me pushime në Greqi e thonë pa druajtje: pak kilometra larg kufirit tonë, në Çamëri, nuk paguhet fare për shezlongët.
Çmimi për to është zero!
Shqipëria, që shumë portale ndërkombëtare e kanë mburrur sivjet për turizmin dhe që shquhet për mikëpritjen e saj, duket se nuk është në të njëjtin nivel.
Ka njëfarë babëzie. Punohet me synime afatshkurtëra. Pronarët e hoteleve apo lokaleve në jug të vendit, në shumë raste shfaqin haptazi tendencën për të marrë sa më shumë para, me pretekstin se punojnë vetëm gjatë tre muajve të verës.
Mirëpo kjo i largon turistët vendas dhe i zhgënjen ata të huaj që shpesh thonë se në Shqipëri një birrë kushton vetëm një euro.
Kjo faturë tatimore që na mbërrin nga Ksamili tregon se vetëm një shezlong kushton 800 lekë.
Por nuk mbaron me kaq. Qytetari që denoncon abuzimin me çmimet na raporton se në rast se qëndron në reshtin e parë të shezlongëve je i detyruar që të hash drekën në lokal, përndryshe të duhet të qëndrosh në rreshtin e dytë apo të tretë ku një shezlong kushton plot 800 lekë.
Në portalin tonë e kemi lavdëruar shumë bukurinë natyrore të Shqipërisë këtë verë.
Mirëpo ky lajm jo vetëm që nuk i jep bukuri turizmit shqiptar, por rrezikon ta dëmtojë atë në rast se sipërmarrësit nuk i thërrasin mendjes.
