Nipi i deputetit të Partisë Socialiste, Rrahman Rrajës, Ramazan Rraja, është personi i cili disa ditë më parë në një video të publikuar në portalin “JOQ Albania” dukej se godiste një grua në oborrin e Qendrës Spitalore “Nënë Tereza”.
Videoja bëri xhiron e rrjetit dhe pati komente të shumta nga njerëzit, ndërsa vetëm 3 ditë pas ngjarjes, Policia e Tiranës, pasi identiteti i të riut u bë i ditur në media, doli edhe me një deklaratë zyrtare, ku shpjegonte se Rraja është proceduar në gjendje të lirë dhe materialet për të janë referuar në Prokurorinë e Tiranës.
POLICIA
Në njoftimin zyrtar, nuk bëhet me dije se për çfarë vepre penale është duke hetuar dhe se kush ishte personi i cili u dhunua prej tij në sy të shumë personave, edhe të një punonjëseje të Policisë që tashmë është pezulluar. Duke iu referuar njoftimit zyrtar, ngjarja ka ndodhur në orët e para të datës 31 korrik, në oborrin e QSUT-së, por nuk bëhen me dije detaje të tjera.
“Lidhur me videon e publikuar në mediat sociale, ku një i ri shfaqet me pamje duke dhunuar një femër në oborrin e spitalit “Nënë Tereza”, Tiranë, në interes të opinionit publik informojmë se: Ngjarja në fjalë ka ndodhur në datë 31.7.2019, rreth orës 07:30 minuta. Shërbimet policore kanë shoqëruar në Komisariat shtetasin R. Rr., 26 vjeç, dhe e kanë proceduar penalisht. Materialet në ngarkim të këtij shtetasi janë referuar në Prokurori për veprime të mëtejshme”, shkruhet në njoftimin zyrtar të Policisë së Tiranës.
MË HERËT
Kujtojmë se disa muaj më parë, djali i deputetit Rrahman Rraja, Rexhep Rraja, u përfshi në një skandal, ku u denoncua nga e dashura për dhunë dhe përndjekje. Ngjarja bëri bujë publikisht, ndërsa më vonë e dashura e tij mohoi të ishte dhunuar. Pavarësisht kësaj, Gjykata e Krujës e dënoi atë për përndjekje. Fillimisht kjo ngjarje u bë publike nga denoncimi i ish-nënkomisar Emiliano Nuhut, i cili pretendoi se për mbylljen e çështjes ishte kërcënuar nga deputeti Rraja dhe Taulant Balla.
Për këtë hetoi Prokuroria e Tiranës, e cila rreth 3 muaj më parë i mbylli hetimet, pasi nuk i gjeti të mbështetura pretendimet e Nuhut.
PEZULLIMI
Në videon e bërë publike dukej se e pranishme në momentin që 26-vjeçari godiste gruan, ka qenë edhe një punonjëse e Policisë, por nga ppamjet duket se nuk ka reaguar. Në njoftimin e djeshëm të bluve të kryeqytetit bëhet e ditur se kjo punonjëse e Policisë është pezulluar nga detyra dhe është duke u kryer verifikimi i veprimeve dhe mosveprimeve të saj. “Gjithashtu, Drejtoria e Standardeve Profesionale në Policinë e Shtetit, pas pezullimit nga detyra të punonjëses së Policisë që ishte pranë vendit të ngjarjes, ka nisur verifikimet për veprimet apo mosveprimet e saj”, shkruhet në njoftim. /Panorama/
