Erion Isai, aktori i humorit që u mandatua nga Rilindja si kryebashkiak i Kolonjës në votimet e 30 qershorit, ka reaguar pas raportimeve në media se ka emëruar si administrator të një prej njësive të bashkisë, Pandi Cungen.
Ky i fundit, sipas mediave, dy ditë para zgjedhjeve kishte qëlluar me thikë në krah një qytetar.
Por ngjarja në fjalë mohohet nga kryebashkiaku, që paralajmëron gjyqe ndaj mediave.
“As thikë, as plagosje, as për arsye banale, as për politikë, aq më pak për mua… apo më banale akoma, për fb, insta, snap… etj etj.
E vetmja plagosje e ndodhur në fakt, është ajo virtuale, që nga gojët e shqyera të politikës përhapet nëpër gazeta dhe portale pa asnjë kujdes për të vërtetën që mund të gjendet lehtësisht në raportet e policisë.
Pandi Cunge, duhet dhe do të ndjekë me gjyq për shpifje, gjithë këtë “thertore” virtuale. Ndërsa s’duhet të ulë vrullin e punës në hapësirën e provës, që detyra kërkon”, shkruan Isai.
