Nga Boldnews.al
Që shteti po “funksionon” në të gjithë hallkat e saj, nga koka më e madhe, deri poshtë në administratë, mjafton të shohësh komunikatat dhe njoftimet policore në këto ditë vere. Kronika më e “rëndësishme” dhe puna më “dinjitoze” e qeverisë sonë lidhet me lirimin e 3500 metrave katrorë plazh publik, nga Saranda në Lezhë.
“Në vijim të operacionit “Plazh i lirë”, nisur dje në Ksamil, Policia e Shtetit ka liruar dhe vënë në dispozicion të pushuesve rreth 3500 m2 plazh, pronë publike, e zaptuar në mënyrë të kundërligjshme nga disa shtetas”-thuhet në njoftimin kaq të “rëndësishëm” të policisë sonë. Një iniciativë e vetë ministrit Sandër Lleshaj pak ditë më parë që premtoi se si: “gjeneral do të luftonte çdo informalitet të mundshëm dhe mbi të gjitha përgjegjësit do i vinte para ligjit”.
Kjo mënyrë qesharake e të qeverisurit, me aksione sa për kronika të thata verore, nuk është gjë tjetër përveçse një tekë e kreut të qeverisë Edi Rama. Përgjatë muajit korrik ai qëndroi disa ditë në plazh në Himarë dhe u kthye prej andej me një mllef të madh. Diku mund ti kishin zënë sytë se nuk priteshin kupona tatimorë, në ndonjë qoshese plazhi kishte para disa çadra të vendosura buzë detit që i prishnin pamjen dhe kaq mjafton që kreu i qeverisë ta kthejë në kauz të madhe.
Policët tashmë kanë “hequr uniformën” dhe do veshin brekë plazhi ngjyrë blu të errët në operacionet që do mbahen mend në histori. Në fakt është një punë që duhet të kryejë administrata lokale, zyrtarucët rilindas të Tatim-Taksave dhe kontrollorët që bredhin biznes më biznes për të mbushur me para ryshfeti atë çantën e vogël të qafës me rrip të hollë lëkure…
Policia e keqpaguar dhe keqtrajtuar nga urdhrat qesharakë të drejtuesve të oficerëve të lartë që i binden politikës në pushtet, janë të detyruar të bredhin plazheve në aksione që nuk sjellin asgjë për qytetarët. Ata duan ruajtjen e qetësisë nga punonjësit e policisë, vendosjen e rendit dhe luftën ndaj krimit, veçanërisht atij të organizuar që herë pas here tramatizon qytetarët në qondrat urbane apo buzë detit.
Ndërsa policia sekuestronte shezlone në Durrës u ekzekutua në derën e shtëpisë së tij një 40 vjeçar. Autorët shkrehën armë në mes të ditës dhe u larguan të qetë, pasi policia ka “prioritet” tekat e kryeministrit.
Gjithashtu kreu i Ministrisë së Brendshme Sandër Lleshaj, tashmë edhe me detyrë politike si i dërguar i Rilindjes në qarkun Lezhë po i jep rëndësi jo rendit, por spektaklit dhe sulmeve ndaj kundërshtarëve politik.
