Kryeministri Edi Rama prej dy ditësh po i bën reklamë Air Albania-s, kompanisë ajrore ku aksioner janë turqit e Turkish Airlines, një biznesmen nga Vlora dhe Qeveria shqiptare.
Një ditë më parë, duke marrë rolin e një menaxheri të mirfilltë ose operatori turistik, Rama njoftonte destinacionet e reja të Air Albania, ndërsa sot në rrjet ka shpërndarë një foto nga avioni i dytë i flotës së kësaj kompanie.
“Me një shërbim ushqimi në bord që ishte harruar prej shumë vitesh për udhëtarët e Rinasit dhe me televizor për çdo pasagjer, si asnjëherë më parë”, e ka përshkruar kryeministri Edi Rama në postimin e bërë në rrjet.
“Tani vazhdoni shani e përqeshni që mos na marrim më sysh, ndërkohë që “Naimi” do t’i shtohet flotës në fund të vitit për destinacione të tjera europiane dhe më tej, do të vijë “Noli” për linjën direkte me Amerikën”.
E ndërsa ka gjetur kohën për të reklamuar Air Albania, Kryeministri ende nuk ka reaguar lidhur me vendimin e DASH-it që i nadlon hyrjen në SHBA ish-kryebashkiakut të Durrësit, Vangjush Dako dhe familjarëve të tij, duke e përfshirë në “listën e zezë”, të cilin Rama e ka mbrojtur nga akuzat që janë artikuluar më parë, e ka një nga bashkëpunëtorët kryesorë politik, madje edhe anëtar të Kryesisë së PS-së dhe de-fakto, drejtues politik për qarkun e Durrësit.
Po kështu, Rama nuk ka gjetur kohë as të reagojë mbi propozimet e Presidentit për gjetjen e zgjidhjes për krizën politike në vend.
Dhe duket se Kryeministri dalëngadalë po kërkon një profesion të ri, jashtë politikës, ndoshta jo duke pleqëruar në jug të vendit, sikundër shprehej dikur me Koço Kokëdhimën, por si operator turistik.
Gjithsesi Rama ka vendosur një rekord, duke u bërë kryeministri i parë që duke qenë në detyrë preferon të bëjë rolin e operatorit turistik, apo reklamuesit.
Postimi i plotë
Pas “Lasgushit”, ja edhe “Migjeni”, avioni i dytë i flotës së Air🦅Albanias🇦🇱 që do të fluturojë në fillimvjeshtë drejt Italisë😁Boeing i vitit 2016, me një shërbim ushqimi në bord që ishte harruar prej shumë vitesh për udhëtarët e Rinasit dhe me televizor për çdo pasagjer, si asnjëherë më parë😉
Tani vazhdoni shani e përqeshni që mos na marrim më sysh, ndërkohë që “Naimi” do t’i shtohet flotës në fund të vitit për destinacione të tjera europiane dhe më tej, do të vijë “Noli” për linjën direkte me Amerikën🙏
Gur gur bëhet mur, mur pas muri bëhet kalaja thotë Populli, po normal që çdo popull ka të paduruarit e të pagdhendurit e vet, kështu që rroftë puna se ajo mbetet, ndërsa llafet lum kush i duron deri kur t’i marrë era😇
