Futbolli anglez përpiqet që të reduktojë numrin e faulleve, zënkat në fushë dhe protestat e tepruara ndaj arbitrit, duke prezantuar kartonin e kuq të përkohshëm.
Pas dy viteve test, FA ka zyrtarizuar rregullin e ri që do të nisë nga ky sezon në kategoritë inferiore të kampionatit anglez.
Përjashtimi i përkohshëm nga fusha, një rregull që përdoret në regbi, por edhe në hokej, do të funksionojë kështu: dënimi parashikon 10 minuta qëndrim jashtë fushe për sjellje që zakonisht lojtarët ndëshkohen me karton të verdhë.
Arbitri, për të përjashtuar nga fusha, do të nxjerrë kartonin e verdhë dhe do të bëjë me shenjë nga vija anësore.
Lojtari i dënuar duhet të kalojë 10 minuta jashtë fushe dhe nuk do të ketë të drejtë të zëvendësohet gjatë kësaj kohe.
Dy përjashtime të përkohshme gjatë një ndeshjeje, sjellin kartonin e kuq.
