“Një diplomat i huaj shantazhohet nga regjimi me fotot me zyrtaren e lartë!”
Kështu shkruan në rrjetin e tij facebook, Kryeredaktori i Rilindjes Demokratike, Blendi Kasmi. Është vetëm një fjali nga e cila mund të kuptosh fare qartë se bëhet fjalë për një diplomat të huaj në vendin tonë dhe me rëndësi të veçantë, i cili përflitet për lidhjet e tij me një zyrtare të lartë dhe se kjo lidhje shfrytëzohet nga drejtuesit e qeverisë për ta shantazhuar. Por ajo ç’ka shkruan Kasmi nuk është e vetme. Edhe më herët është aluduar se një diplomat i huaj ka probleme në vendin tonë si me drogën ashtu edhe me çështje të tjera më të ndjeshme.
Më herët ka qenë kryetarja e LSI-së Monika Kryemadhi ajo që ka akuzuar direkt ambasadorin e OSBE-së në Shqipëri Bernard Bachard, se ka probleme të mëdha dhe për këtë qëllim është i pozicionouar përkrahë kryeministrit Edi Rama.
Kryemadhi do të paralajmëronte në një prononcim direkt Borchard se ka probleme në vendin tonë dhe për këtë qëllim duhet të kishte kujdes.
“Ai (Bernard Borchardt) ka probleme këtu, duhet të jetë shumë i kujdesshëm se po t’i bëhet vettingu atij dhe ndonjë tjetri nuk dihet si del. Shqiptarët nuk janë qen dhe mace dhe të bëjë si të dojë ai, se këtu është buka dhe jeta e shqiptarëve, ai ikën dhe nuk e kthen më kokën pas. Duhet të kenë kujdes ambasadorët kur flasin për shqiptarët se nuk janë Zot këtu. Meta, Rama dhe Basha e kanë tjetër gjuhën me ndërkombëtarët, ndërsa unë tjetër dhe do e çoj deri në fund. Nëse këta ambasadorët që po bëjnë xhiron e velinave të parlamentit, pasi futja e hundëve në punët e një shteti dhe ngatërrimi me segmente antishqiptare është shumë e rrezikshme. Ndërkombëtarët janë bërë qesharakë këtu. Kam shumë miq që janë ambasadorë, që janë shumë të mirë dhe pozitiv, por veprimet e 2-3 njerëzve që janë emocionalë u prishin punë”, ka deklaruar Kryemadhi në emisionin ‘Repolitix’.
