Ministrja e Mbrojtjes, Olta Xhaçka, i është përgjigjur kërkesës së dy ditëve më parë të Presidentit Ilir Meta, lidhur me shqetësimet e shprehura prej tij për rrezikun e goditjes së vendit tonë, si pjesë e Rajonit, nga një tërmet apokaliptik.
Në letrën e tij, drejtuar Kryeministrit dhe disa ministrave, Meta i referohet paralajmërimeve të bëra nga sizmologu grek, Tsentelis, sipas të cilit një tërmet apokaliptik mund të godasë Rajonin e Ballkanit, përfshi këtu edhe Greqinë.
Por Xhaçka në përgjigjen e saj drejtuar Metës, thekson se parashikimi i tërmeteve është përtej mundësive të shkencës.
Ajo thekson se pas konsultimeve edhe me IGJEUM, parashikimi i tyre është i pamundur.
“Sizmologu Tsentelis përgënjeshtroi lajmin e rremë që u bë shkas për shqetësimin tuaj.
Qeveria dhe Ministria e Mbrojtjes, kanë vëmendje maksimale ndaj fatkeqësive natyrore, madje jemi më të përgatitur se kurrë në këto 30 vite për t’u përballur me emergjencat.
Kapacitetet tona reaguese janë sot shumë më të mëdha, profesionalizmi i jashtëzakonshëm, koordinimi institucional është shumë më efikas se çka qenë ndonjëherë.
Mënyra sesi përballuam tërmetin në Korçë janë prova më domethënëse e seriozitetit të përgatitjeve tona.
Shprehja më e qartë e seriozitetit të punës sonë është ligji “Për Mbrojtjen Civile”, që po pret dekretimin nga ana juaj.
Ligji, asistuar nga ekspertë vendas e të huaj transformon qasjen ndaj emergjencave dhe zhvendos fokusin nga reagimi, tek parapërgatitja, parandalimi e zvogëlimi i riskut.
Dekretoni ligjin, jepni një kontribut real në përgatitjen e vendit për t’u përballur me fatkeqësitë natyrore”, thuhet në përgjigjen e Xhaçkës, drejtuar Presidentit Meta.
