Nga Boldnews.al
Bashkia Devoll është zgjedhur nga Edi Rama të jetë prova e parë e forcës për Kryebashkiakun. Si dhe pse u zgjodh Devolli mes 24 bashkive që drejtohen nga opozita, këtë e di vetëm Edi Rama, por kjo bashki mund të konsiderohet si bastioni i parë që Kryeministri mund të thyhet ose “pushtojë”.
Kryebashkiakët e opozitës kanë deklaruar se nuk kanë ndërmend të lëshojnë zyrat për pasardhësit e tyre të dalë nga votimet e 30 qershorit, që nuk njihen nga opozita, Presidenti dhe për më tepër ka një ankimim në Gjykatën Kushtetuese.
Por çfarë pritet të ndodhë nesër në Devoll, ku Rilindja ka vendosur të konstituojë Këshillin Bashkiak dhe Eduard Duro të marrë zyrtarisht detyrën? Kryebashkiaku aktual Bledjon Nallbati, përfaqësues i PD pritet ti qëndrojë vendimit deri në fund, pra të mos dorëzojë zyrën një pasardhësi që sipas opozitës nuk është i zgjedhur ose më saktë ëshë votuar me një proces antikushtetues. Në kushte të tilla mjeti i vetëm që ka Rilindja është përdorimi i forcës.
Dhe forcën e ka treguar kundër opozitës në protesta, kundër qytetarëve që i helmon me gaz, kundër artistëve që mbrojnë Teatrin, apo kundër atyre që mbrojnë banesat e tyre. Format e dhunës kanë qenë të ndryshme, nga rrahjet, kërcënimet, hedhja e gazit, presionet, ndalimet dhe arrestimet.
Se cilën formë do të përdorë me gjasë nesër policia kundër Kryebashkiakut në detyrë apo mbështetësve të opozitës, nuk dihet, por Rama do të shkojë drejt përplasjes. Këtu gjithçka do të varet nga sjellja e opozitës, e cila më parë ka deklaruar se do ti pergjigjet në mënyrë proporcionale dhunës.
Po kështu nuk dihet nëse vendosmërisë do ti shkohet ose jo deri në fund, por prova që ka nesër opozita në Devoll është shumë më e rëndësishme se vijimi i një procedure që u nis keq, u realizua shumë keq dhe po tentohet të mbyllet në mënyrë skandaloze nga Rilindja.
Një shprehje e kohës së diktaturës thotë se “nuk ka kala që s’marrin komunistët” dhe ndoshta ky mund të jetë frymëzimi i Edi Ramës në betejën e parë për të pushtuar zyrat e bashkive.
Ndaj dhe Devolli duhet konsideruar nga opozita si prova e parë e vendosmërisë për të thyer jo Edi Ramën dhe Rilindjen, por idenë e krijuar se ai mund të rrëmbejë gjithçka që sheh në ëndërr.
