Si asnjëherë më parë, Kryeministri Edi Rama ka reaguar për të tretën herë, brenda pak minutash, lidhur me përplasjen e ndodhur një ditë më parë të Teatri Kombëtar.
Në reagimin e 3-të të tij, Rama ka preferuar të postojë në rrjet, një qëndrim të aktores Rajmonda Bulku, e cila mbështet ndërtimin e një Teatri të ri Kombëtar.
Por ajo që tërheq vëmendjen është fakti se Edi Rama, pas përplasjeve të krijuara dje mes policisë nga njëra anë, dhe aktorëve e artistëve nga ana tjetër, është në një situatë të pakëndshme.
Të paktën kjo tregohet nga reagimet e shumta lidhur me Teatrin, çështje që ai për kohë me rradhë e konsideronte të mbyllur, madje preferoi të çojë forca të shumta policore për të larguar qytetarë, artistë dhe aktorë që qëndronin edhe në orët e natës në mbrojtje të godinës.
Reagimi i Ramës
Minoranca e zhurmshme dhe e verbër teatralo -politike, nuk përfaqëson asfare opinionin e shumicës së komunitetit të artistëve të skenës, për projektin e Teatrit Kombëtar!
Ja çfarë mendon një aktore e njohur e skenës kombëtare, e cila jo vetëm s’ka asnjë lidhje me këtë shumicë qeverisëse, po ka qenë aktive si qytetare qysh në kohën e ndryshimeve historike dhe më pas edhe si deputete, në radhët e Partisë Demokratike:
RAIMONDA BULKU
Aty duhet të ketë një teatër shumë të mirë, ç’më duhet mua se çfarë ndërtohet anës teatrit, apo mbi teatër. Në qiell le të ndërtohet, s’kam ndonjë gjë; unë dua të ndërtohet një teatër. Nuk ka rëndësi fare se çfarë. Godina e teatrit duhet shembur, pa dyshim.
Ne po përjetojmë kushte mizerabël. Unë nuk e di se si punojmë aty, është turp të punosh aty. Tani që u gjet Turbina, shumë mirë, ajo sallë është për atë zonë, atë lagje dhe si ajo duhet të ndërtohet edhe një në Kombinat, edhe një në Laprakë, që padyshim është një lagje afër Tiranës.
Unë do të dëshiroja që të ngrihet një Teatër i ri Kombëtar, me parametra të tjerë.
