Kryetari i Partisë Demokratike, Lulzim Basha ia bashkua mbrëmjen e sotme protestuesve te Teatri Kombëtar, të cilët kundërshtojnë shembjen e godinës, siç e parashikon ligji i miratuar në Kuvend nga mazhoranca.
Basha përshëndeti qëndresën e artistëve dhe qytetarëve dhe premtoi nënshkrimin e një marrëveshje me Aleancën për Teatrin, nesër në orën 11:30.
“Të dashur artistë, qytetarë, ju falenderoj për shembullin e jashtëzakonshëm, heroik, qytetar dhe europian që i treguam mbarë botës me qëndresën tonë, që me Aleancën për Teatrin, kauzën më fisnike, mirënjohje për sakrificën tuaj. Zonja dhe zotërinj të aleancës, jeni krenaria dhe frymëzimi për opozitën, qytetarët, jeni etaloni i ri i qëndresës së pathyeshme të qytetarëve të bashkuar kundër së keqes”, tha Basha.
“Kërkoj nga gjithë qytetarët, gjithë mbështetësit e Aleancës për Teatrin dhe mbështetësit e opozitës, të jemi të gjithë këtu nesër në 11:30, se brenda teatrit do nënshkruajmë marrëveshjen me Aleancën për Teatrin, marrëveshjen për Teatrin Kombëtar, për kulturën kombëtare, e cila do të bëhet realitet ditën e parë që vendi të ketë një qeveri nga njerëzit, të njerëzve dhe për njerëzit”, shtoi kryeopozitari, pa dhënë më shumë detaje rreth marrëveshjes në fjalë.
Opozita e bashkuar është rreshtuar prej kohësh në krah të artistëve që kundërshtojnë shembjen e godinës së Teatrit Kombëtar. Basha ka premtuar edhe më herët se me ardhjen në qeveri të PD-së, ligji që parashikon shembjen do të rrëzohet. /BN/
