Kryeministri Edi Rama ka shprehur vendosmërinë për shembjen e godinës së Teatrit Kombëtar, ndërsa u shpreh se asnjë minorancë nuk mund të marrë peng vendin.
Reagimi i Ramës ka ardhur pas përplasjeve te Teatri Kombëtar në orët e para të mëngjesit të sotëm, kur policia ndërhyri për largimin e aktorëve, artistëve dhe qytetarëve që prej kohësh kundërshtojnë projektin Rama-Veliaj.
“Asnjë minorancë nuk mund të marrë peng asgjë e askënd në këtë vend.
Megjithë respektin për një minorancë aktorësh teatri dhe politikanësh që s’kanë hyrë kurrë në teatër, po janë mësuar të bëjnë teatër me çdo gjë.
Teatri i ri Kombëtar do të ndërtohet si plan e përgjegjësi qeverisëse.
Teatrin e ri Kombëtar e kërkon kryeqyteti, vendi, kombi e shumica e komunitetit të artistëve të skenës.
Njësoj si Stadiumi i Ri kombëtar ai do të jetë një gur kilometrik në rrugën e Shqipërisë që duam.
Kush s’është dakord është i respektuar, po s’ka as mandat as të drejtë të pengojë”, shkruan Rama.
Ndërkohë, Presidenti Ilir Meta pritet të depozitojë në Kushtetuese ankimimin për ligjin që shemb godinën e Teatrit Kombëtar.
