Nga Boldnews.al
Zyra qendrore e OSBE-së në Vjenë, me shumë të drejtë, reagoi me forcë shurdhuese, për herë të dytë kundër ligjit të Edi Ramës mbi kontrollin e medias online, duke vendosur thelbin tek fakti që Autoriteti i Mediave Audiovizive (AMA) nuk mund të marrë kompetencat e gjykatës.
Po me një reagim shurdhues, por kësaj radhe në kahun e kundërt, me heshtje të plotë, OSBE nuk bëri asnjë koment kur një tjetër institucion administrativ shqiptar, Komisioni Qendror i Zgjedhjeve (KQZ), mori dy muaj më parë kompetencat e Gjykatës Kushtetuese, duke mos pranuar dekretin presidencial që shfuqizonte 30 Qershorin si datën e zgjedhjeve për pushtetin vendor.
Në një letër që Përfaqësuesi i OSBE-së për Lirinë e Medias, Harlem Désir, i dërgon kryeministrit shqiptar Edi Rama, dhe e publikuar paraditen e kësaj të Martë, ai rithekson se: “AMA ose ndonjë organ administrativ apo rregullator nuk duhet të merret me çështjet e shpifjes, të cilat duhet të mbeten nën kompetencat e gjykatave”.
Organizata për Sigurinë dhe Bashkëpunimin Europian duket e vendosur për të nxitur respektimin e parimeve të fjalës së lirë në Shqipëri, si edhe për mbrojtur pushtetin e katërt, median, nga ndërhyrjet abuzive të kryeministrit dhe qeverisë së tij.
Ky qëndrim është i mirëpritur nga media dhe publiku shqiptar, duke u konsideruar si e vetmja mënyrë për të përballur arrogancën qeveritare ndaj medias.
Megjithatë, OSBE nuk mbajti asnjë qëndrim kritik kur, shumica e majtë në Komisionin Qendror të Zgjedhjeve, me të njëjtën arrogancë qeveritare, vendosi që të mos njihte dekretin e presidentit Ilir Meta, i cili “shfuqizoi” 30 Qershorin si ditë e zgjedhjeve lokale, duke cënuar në këtë mënyrë një prej 3 shtyllave të themelit të shtetit-pushtetin gjyqësor.
Madje, jo vetëm kaq, por OSBE, së bashku me ODIHR-in, vendosën të mbanin në detyrë vëzhguesit e procesit monist të fundit të Qershorit 2019.
Ligji Themeltar i Shqipërisë parashikon se kushtetutshmëria e dekreteve të Presidentit shqyrtohet vetëm nga Gjykata Kushtetuese. Pra, është kjo gjykatë, e cila duhet të vendosë nëse dekreti presidencial është apo jo në përputhje me Kushtetutën.
Por, në mungesë të Gjykatës Kushtetuese, për shkak të Reformës së rrëmujshme në Drejtësi, kompetencat e saj i përvetësuan në mënyrë flagrante dhe abuzive 4 anëtarët e zgjedhur nga Partia Socialiste në Komisionin Qendror të Zgjedhjeve.
Në 10 Qershor 2019, Presidenti njoftoi shfuqizimin e dekretin “Për caktimin e datës së zgjedhjeve lokale”, duke anuluar datën 30 Qershor, të përcaktuar që në Nëntor 2018 si ditë e zhvillimit të procesit.
Ky vendim i Presidentit, në këndvështrimin e tij, ishte reflektim i situatës së vështirë politike. Opozita (PD-LSI) kishte vendosur të mos regjistrohej për zgjedhjet lokale, si një reagim i fortë përballë provave mbi blerjen/vjedhjen e votave nga ana e Partisë Socialiste në pushtet, në zgjedhjet e përgjithshme të vitit 2017.
Në këtë situatë të vështirë politike, Meta vendosi që të shfuqizonte datën e zgjedhjeve, me qëllimin, sipas shpjegimit të tij, që t’u jepte mundësi palëve politike të gjenin gjuhën e dialogut.
Vendimi i Metës u kundërshtua menjëherë politikisht nga kryeministri Edi Rama, i cili deklaroi se njeh 30 Qershorin si ditën e zgjedhjeve. Qëndrimi politik i Ramës u pasua nga qëndrimi “me argumenta ligjorë” të anëtarëve të majtë të Komisionit Qendror të Zgjedhjeve.
Nën drejtimin e nënkryetarit të KQZ-së, Denar Biba, përfaqësuesit qeveritar në atë institucion vendosën që të mos e njihnin dekretin e Presidentit.
Në argumentat e tyre, 4 anëtarët e KQZ-së mbrojtën qëndrimin se Presidenti nuk e ka tagrin kushtetues për “shfuqizim dekreti” dhe, po sipas tyre, qëndrimi i Presidentit është “absolutisht i pavlefshëm”.
Në vijim të këtij qëndrimi, KQZ nuk njohu as dekretin e ri të Presidentit, në të cilin caktohej 13 Tetori si datë e zgjedhjeve lokale. Të majtët, përfshirë edhe socialistët e KQZ-së, zhvilluan zgjedhjet mono-partiake të 30 Qershorit.
Ky proces votimi, i zhvilluar në mungesë të dekretit presidencial, u monitorua nga vëzhguesit e OSBE/ODIHR-it. Në raportin paraprak, vëzhguesit ndërkombëtarë renditën një seri problematikash në procesin elektoral.
Por, OSBE/ODIHR-i nuk dha asnjë koment mbi faktin që Komisioni Qendror i Zgjedhjeve uzurpoi kompetencat e Gjykatës Kushtetuese, duke e konsideruar dekretin e Presidentit “absolutisht të pavlefshëm”.
Gjithashtu, vëzhguesit e OSBE/ODIHR-it nuk dhanë asnjë koment nëse do të njohin datën 13 Tetor si ditën zyrtare të zgjedhjeve lokale dhe nëse do të monitorojnë procesin, sipas përcaktimeve të dekretit presidencial.
