Policia e kryeqytetit tha dhe se oficerët e Antidrogës, në bashkëpunim me ata të Komisariatit nr.1, goditën një tjetër rast të shpërndarjes së drogave të forta në doza të vogla, në lokalet e natës.
Gjatë një operacioni të koduar “Frekuentuesit”, u arrit të arrestohen 3 të dyshuar, që hiqeshin si klientë të një lokali nate dhe më pas shisnin aty lëndë narkotike të llojit kokainë. Ndërsa gjatë kontrollit të kryer nga Policia, u gjet edhe një sasi prej 3.7 kg pluhur i bardhë, i dyshuar si përzierës i kokainës.
Në pranga përfunduan Mariglen Ismaili, 35 vjeç, Genti Xhabej, 43 vjeç, dhe Elvis Fejzullai, 22 vjeç, të tre banues në Tiranë. Ndërsa në cilësinë e provës materiale u sekuestruan edhe prova të tjera ligjore që do shërbejnë për dokumentimin e kësaj veprimtarie kriminale të shpërndarjes së drogave të forta.
OPERACIONI
Policia e Tiranës tha dje se në bazë të planit të masave të hartuara nga ana e Seksionit për Hetimin e Narkotikeve, në kuadër të goditjes dhe dokumentimit ligjor të veprimtarisë kriminale në fushën e narkotikëve, shpërndarjes dhe përshtatjes për përdorim droge të lokaleve të natës, klubeve, tallavave, në bashkëpunim me Komisariatin e Policisë Nr.1, u finalizua me sukses operacioni policor antidrogë, i koduar “Frekuentuesit”.
“Gjatë këtij operacioni u kapën dhe u arrestuan në flagrancë për veprën penale ‘Prodhimi dhe shitja e narkotikëve’ kryer në bashkëpunim, shtetasit: Mariglen Ismaili, 35 vjeç, Genti Xhabej, 43 vjeç, dhe Elvis Fejzullai, 22 vjeç, banues në Tiranë”, tha dje Policia. Nga ana e Seksionit për Hetimin e Narkotikëve të Drejtorisë Vendore të Policisë Tiranë, në bashkëpunim me Komisariatin Nr.1, është marrë informacion në rrugë operative se në rrugën “Budi”, në katin e parë të një pallati, ndodhet një ambient, ku në bazë të informacioneve dyshohej se persona të ndryshëm e frekuentonin këtë ambient duke tregtuar dhe konsumuar lëndë narkotike të llojit kokainë.
Në këtë kuadër u organizua dhe finalizua operacioni, duke ushtruar kontroll në ambientet e lokalit, ku si rezultat, këtyre shtetasve iu gjetën disa doza me lëndë narkotike të dyshuar kokainë, si dhe nga kontrolli i mëtejshëm i ambienteve u gjet dhe u sekuestruan edhe 3.7 kilogramë pluhur i dyshuar përzierës për kokainën.
“Në cilësinë e provës materiale u sekuestruan edhe prova të tjera ligjore që do shërbejnë për dokumentimin e kësaj veprimtarie kriminale të shpërndarjes së drogave të forta. Materialet procedurale do t’i kalojnë Prokurorisë pranë Gjykatës së Shkallës së Parë Tiranë, për veprime të mëtejshme hetimore, në ngarkim të shtetasve të mësipërm, të cilët janë arrestuar në flagrancë, për veprën penale ‘Prodhimi dhe shitja e narkotikëve’ e kryer në bashkëpunim”, tha zyrtarisht Policia.
