Kryeministri i Kosovës, Ramush Haradinaj dha dorëheqjne ditën e premte, për shkak se është thirrur në Gjykatën e Hagës, në lidhje me luftën e Kosovës. Pavarësisht se tashmë është një kryeministër në ikje, Haradinaj nuk i ka ndërprerë aktivitetet politike.
Ditën e sotme ai ka qenë në një ceremoni përkujtimore për Shejh Myhedin Shehu, të cilit iu ngrit një shtatore në Rahovec.
“Në 21-vjetorin e rënies, njëri prej personaliteteve më të spikatura të historisë së Kosovës dhe mbarë kombit shqiptar, Shejh Myhedin Shehu, atdhetari i paepur, vjen i skalitur në bronz si simbol qëndrese. Sakrifica e tij për të drejtën shqiptare është frymëzuese edhe sot, kur të gjithë ne duhet të vihemi në shërbim të Atdheut, në mbrojtje të lirisë dhe sovranitetit të shtetit. Lavdi e përjetshme jetës dhe veprës së Heroit të Kosovës, Shejh Myhedin Shehut’, shkruan Haradinaj në rrjetet sociale, përkrah fotove nga aktiviteti.
Në konferencën ku Haradinaj lajmëroi dorëheqjen, tha se javën tjetër duhet të paraqitet në Hagë, pa specifikuar datën.
