Zbulohet vrasësi i 29-vjeçares shqiptare Floreta Islami, i cili është serial-killeri italian Maurizio Minghella.
I dënuar me 131 vjet burg për vrasjen e disa prostitutave, Maurizio mendohet se ka mbytur me një shall edhe shqiptaren në Rivoli të Torinës.
Ngjarja, e cila ka ndodhur 18 vjet më parë, më 14 shkurt të vitit 1998, tronditi opinionin publik asokohe.
Sipas asaj që shkruan shtypi italian, zbulimi erdhi nga prokuroria pasi në pambukun e shallit, u gjetën mbetje biologjike e vrasësit dhe kjo u mësua pas analizave mjeko-ligjore që çuan në identifikimin e profilit gjenetik që rezultoi se ishte Maurizio Minghella.
Nga kontrollet e vazhdueshme të policisë, ka rezultuar se në atë periudhë, serial-killeri frekuentonte zonën e Rivolit, ku vajza shqiptare u gjet e vdekur, pranë rrugës “Susa”, ku ndalonte të vëzhgonte prostitutat e pranishme.
Në fund të hetimeve, prokuroria i ka komunikuar në Pavia, ku ndodhet i burgosur, edhe akuzën e vrasjes së Floreta Islamit.
Maurizio Minghella akuzohet për vrasjen e 15 grave dhe vajzave nëpërmjet aktit brutal të mbytjes rreth qafës.
