Teuta fitoi 1-0 takimin e kthimit përballë Ventspils në “Niko Dovana”, por ajo humbje e para një jave në Letoni 3-0 bëri që të besuarit e Bledi Shkëmbit të eliminohet nga Europa League. Autori i vetëm i golit për Teutën ishte mesfushori Sherif Kallaku, në minutën e 47-të.
Ndeshja nisi shumë mirë për “Djemtë e Detit”, që e kërkuan golin që në sekondat e para të sfidës. Megjithatë, rastet e krijuara nuk u shfrytëzuan dhe goli mungoi. Pjesa e parë u mbyll me rezultatin e bardhë, 0-0.
Pjesa e dytë nisi me të njëjtin ritëm, me Teutën që mendoi vetëm për të sulmuar. Goli do të vinte shumë shpejt, që në minutën e 47-të. Kallaku bën gjithçka mirë brenda zonës, driblon kundërshtarët duke dhuruar spektakël dhe arrin të kalojë ekipin durrsak në avantazh.
Pritej që Teuta të shënonte sërish dhe të rihapte fatet e kualifikimit, por Ventspils u mbrojt dhe u largua nga Durrësi si skuadra e kualifikuar.
Shkëmbi: Eliminimi, rezultat i ndeshjes së parëë
Pas ndeshjes, trajneri Bledi Shkëmbi tha se eleminimi erdhi si pasojë e rezultatit të takimi në Letoni.
“Bëmë një lojë të mirë, eliminimi ishte si rezultat i ndeshjes së parë. Sot bëmë një lojë më të mirë, patëm disa raste për të shënuar edhe më shpejt, patëm raste edhe për të shkuar në 2-0. Për fat të keq, nuk arritëm të shënojmë. Falënderoj djemtë që dhanë maksimumin. Ishte dhe një orar i keq për të luajtur futboll. Gjithmonë do të them se jam i kënaqur me lojtarët. Futbollistët e ardhur këtë merkato kanë bërë mirë dhe do të na shërbejnë gjatë sezonit. Do ishte më mirë të kualifikoheshim, por vuajtëm gabimet e ndeshjes së parë”. Kjo Teutë është e cunguar, shpresoj të bëjmë afrimet e duhura. Nuk besoj të ketë largime, ndoshta ndonjë largim, por largime jo. Kemi pak lojtarë, nëse largohet ndonjë, do të jetë lojtar i veçantë”, tha Shkëmbi.
