Nga Boldnews.al
Ai të denigron, të fyen, tenton të poshtërojë dhe në fund të shkarkon, të nxjerr nga sistemi, të vë pas një luguni kritikuesish tru larë, shpëlarë, e tharë në lavanderinë e Rilindjes.
Kjo po ndodh me këdo individ që ka dalë kundër autoritarizmit të kryeministrit dhe nismave të tij, gjithnjë e më shumë të rrezikshme. Në ditën e parë të punës në themel të Komisionit Hetimor Parlamentar për shkarkimin e kreut të shtetit Ilir Meta, ndërsa flitej sesi presidenti do i kishte ditët e numëruara, një grup prej 28 deputetësh socialistë depozituan në kuvend nismën për shkarkimin e anëtarit të këshillit mbikëqyrës të Bankës së Shqipërisë Arben Malaj.
“Nëse analizohen daljet publike të zotit Malaj arrihet në konkluzionin se ato dalje nuk i kanë shërbyer interesit më të mirë të Bankës së Shqipërisë, nuk është marrë parasyshë karakteri publik i funksionit që ushtron anëtari i Këshillit të Mbikqyrjes të BSH dhe kjo natyrë sjelljeje nuk i ka shërbyer aspak ruajtjes dhe nxitjes së besimit në publik, nuk reflektohet përgjegjësi institucionale në raport me temat e trajtuara dhe qëndrimet publike të mbajtura për to, dhe nuk referohet rëndësia e detyrave dhe përgjegjësive, temat e trajtuara në publik mund të kenë ndikim negativ mbi detyrimet që ka ndaj BSH dhe vlerësime që janë pjesë e analizave politike e të lidhura me grupime politike”, thuhet ndër të tjera në kërkesën e socialistëve.
Pas publikimit të kerkesës për shkarkimin e Malajt, reagoi edhe ai vete, duke pranuar se ka pasur shantazhe. “Kërcenimet paralajmëruese mi ka dërguar Taulant Balla pas mospranimit të ndërhyrje së tij edhe me SMS me rekomandime partiake, në proceset përzgjedhës në Bordin e Bankës së Shqipërisë. Shqetësimi është i protokolluar në mbledhjen e Bordit të BSh”-shprehet Malaj, ndërsa shton se: “Fakti që pas shkarkimit nga Erdogan të Guvernatorit të Bankës së Turqisë, ky mund të jetë rasti i dytë që mazhorancat e gjithë pushteteshme shkarkojnë një anëtar Bordi të Bankës Qëndrore”.
Gjithçka lidhet me daljet publike të Malajt, në analizë të situatës që po kalon vendi dhe veçanërisht kritikave ndaj kryerilindasit Edi Rama. Kjo është parë me shqetësim nga organizata “bazë e partisë”, e cila nëpërmjet 28 shokëve dhe shoqeve në Parlament, kërkon shkarkimin e tij.
Kryeministri ka një taktikë që e kanë përdorur të gjithë autoritarët politik. Në fillim të bën gjyqin publik të Rilindjes. Të ndërsen Taulantin, Elisën, Eduardin apo Fredin. Ata me gjuhën e tyre të ashpër, shpotitëse, të nxjerrë nga fjalorët e shpikur prej copëzave letrare dhe përroit psikik të kryeministrit, të denigrojnë. E pavarësisht çfarë thonë, ku ka denigrim më të madh se të përfundosh në gojët e tyre.
Për t’i dhënë “aromë ligjore”, ose goditjen e fundit “armikut të të madhit”, është gati kafshuesi i radhës, Ulsi Manja. Një “gjeni i vëtëshpallur” që të tregon ligjin, edhe pse me mangësi të theksuara profesionale dhe etike.
Ky burrë të shkarkon, ndonëse është në listën e gjatë të atyre Rilindasve të kapur në përgjimet e dosjes 184, ku flitet për shitblerje votash, trafik influence dhe pazare të ulëta, që sot janë normë karriere krah të madhit, shokut Edi.
Reprezalja që kreu i qeverisë po bën ndaj çdo zëri kritik nuk është diçka e re për sojin e tij, por kohët e fundit ka ndërmarrë “operacione spastrimi” në të gjithë vendin, për të larguar armiqtë e brendshëm. E ka shumë më të lehtë që nëpërmjet kanakarëve të tij në Parlament të sulmojë çdo zë kritik që vjen nga bota akademike apo shoqëria civile.
