Zbardhen kërkesa që 28 deputetë të PS-së i kanë drejtuar kryeparlamentarit Gramoz Rucci për shkarkimin e Arben Malajt nga posti i anëtarit të Këshillit Mbikqyrës së Bankës së Shqipërisë.
Kërkesa për shkarkimin e Malajt arsyetohet me qëndrimet publike të tij, të cilat theksohet se “dëmtojnë imazhin e Bankës së Shqipërisë”.
“Secila prej daljeve publike të anëtarit të Këshillit të Mbiqyrjes dhe të gjitha rastet së bashku mund të çojnë në konkluzionin që temat e trajtuara dhe qëndrimet e shprehura, mund të kenë ndikim negativ mbi detyrimet që ai ka ndaj Bankës së Shqipërisë dhe duke qenë se ato shprehin qëndrime dhe vlerësime që janë pjesë e analizave politike të lidhura me grupime politike, besojmë se ato dëmtojnë imazhin e Bankës së Shqipërisë”, thuhet në kërkesën e 28 deputetëve të PS-së.
Ndër deputetët që kanë firmosur shkarkimin e Malajt janë: Taulant Balla; Ervin Bushati; Rrahman Rraja; Adnor Shametaj; Jurgis Çyrbja; Florenc Spaho; Bujar Çela; Almira Xhembulla; Fadil Nasufi; Ismet Beqiraj; Sadi Vorpsi; Elio Hyska; Ulsi Manja etj.
Ndërkohë kërkesa nuk është firmosur nga ministra apo edhe nga kryeministri Edi Rama.
