Një tërmet 7,3 ballësh ka goditur qytetin Terante, që gjendet në juglindje të Indonezisë, njoftoi Shërbimi Gjeologjik i Shteteve të Bashkuara.
Tërmeti ishte në thellësi prej 10 kilometrash, me epiqendër prej 168 kilometrash në juglindje të qytetit Ternate, tha ky shërbim, transmeton Reuters.
Agjencia meteorologjike e Indonezisë tha se deri më tani nuk ka alarm se nga ky tërmet mund të shkaktohet cunami. Pas tërmetit të parë, rreth 30 minuta më vonë, kjo agjenci njoftoi se ka pasur një tërmet tjetër 5,8 shkallësh të Rihterit.
Ende nuk ka raportime të lënduar nga tërmeti. Ndërsa pamjet e para të publikuara tregojnë panikun mes popullatës.
Indonezia është e prirur për tërmete sepse shtrihet në Unazën e Zjarrit, linjën që përshkon të gjithë oqeanin paqësor. Në këtë pjesë ndodhin shpesh edhe shpërthime vullkanike.
