Lidhur me mbledhjen e Komisionit Hetimor Parlamentar për grumbullimin e fakteve për shkarkimin nga detyra të Presidentit Ilir Meta. ka reaguar kreu i Partisë Agrare Ambientaliste, Agron Duka.
Përmes një postimi në Facebook, Duka e konsideron mbledhjen e komisionit një gjyq publik për të zhvendosur vëmendjen, ndërsa vendi sipas tij nuk qeveriset, por sundohet nga një pakicë që të vetmin plan, – argumenton ai- ka mbajtjen e pushtetit me çdo kusht dhe me çdo kosto .
“Shyqyr që doli ky Komisioni Hetimor për Presidentin e Republikës, sepse përndryshe, opinioni publik do të duhej të merrej me ngritjen e çmimit të naftës, me ngadalësimin e rritjes ekonomike, me mungesën e investimeve të huaja, me projektligjin që kërcënon median online, me përgjimet e Bild, me rënien e rendit kushtetues dhe me dhjetra probleme të shtyra në kalendat greke. Ku ka më mirë se një gjyq publik për të spostuar vëmendjen gjetkë, ndërsa vendi nuk qeveriset, por sundohet nga një pakicë që të vetmin plan, ka mbajtjen e pushtetit me çdo kusht dhe me çdo kosto”, shkruan Duka.
