Nikë Lulashi, autori i dyshuar i vrasjes së Tahir Bajraktarit, ngjarje e ndodhur më datë 18.09.2018, në bjeshkën e Doberdollit, Tropojë, është vënë në pranga.
Burime zyrtare nga policia njoftuar këtë të enjte se 55-vjeçari u arrestua në bazë informacioneve të siguruara në rrugë operative, në fshatin Bregu Lumit, në Dukagjin. Aksioni për kapjen e tij u zhvillua nga strukturat e Komisariatit të Policisë Shkodër në bashkëpunim me Drejtorinë Vendore të Policisë Shkodër.
Gjykata e Rrethit Tropojë me vendim nr. 35 datë 25.09.2018 ka caktuar ndaj 55-vjeçarit Nikë Lulashi masën e sigurisë “Arrest në burg”, për veprat penale “Vrasja me dashje” dhe “Mbajtja pa leje dhe prodhimi i armëve, armëve shpërthyese dhe i municionit”.
“Ky shtetas do i dorëzohet shërbimeve të Drejtorisë Vendore të Policisë Kukës për veprime të mëtejshme”, njoftoi policia e Shkdorës.
Krimi
Viktima kishte udhëtuar nga Tirana në drejtim të Tropojës në fshatin e tij Doberdol për të kaluar pushimet.
Bajraktari është qëlluar për vdekje me armë zjarri brenda në banesën e tij. Fillimisht ngjarja u raportua si vetëvrasje, por grupi hetimor brenda disa orësh ka konstatuar se jemi të bëjmë me një ngjarje kriminale. Autori i krimit ishte i punësuar nga Bajraktari në shtëpinë e tij në Doberdol. Sipas hetimeve, mes autorit dhe viktimës ka pasur një konflikt për pagesën që do merrte 54-vjeçari i punësuar. Nik Lulashi dyshohet se ka kërkuar më shumë para sesa i ka ofruar viktima për punën e kryer në objekt dhe kjo mendohet se ka ndezur debatin mes të dyve.
Banorë të zonës treguan se Tahir Bajraktari shkonte çdo vit në shtëpinë verore në bjeshkët e Tropojës ku kalonte pushimet, ndërsa njihej si njeri i qetë dhe pa probleme. Ai kishte rindërtuar shtëpinë në bjeshkë si dhe kishte arritur ta elektrifikonte vetë përmes investimit në një mini-HEC, me të cilin furnizonte me energji edhe fqinjët si dhe kishte shtrirë edhe linjën e internetit deri në Bjeshkë. /BN/
