Situata e rënduar që mbizotëron aktualisht në Gjykatën e Lartë ka qenë në fokus të interesimit të medias, teksa pyesnin Kryetarin e kësaj Gjykate Xhezair Zaganjori. Ai thotë se emërimi i katër anëtarëve jo gjyqtarë do t’i jepte frymëmarrje kësaj gjykate, të paktën për çështjet emergjente.
Zaganjori: Në një farë kuptimi po, të paktën e bën të mundur të funksionojë gjykata.Ka çështje që trajtohen dhe me tre gjyqtarë, çështjet civile. Por të paktën çështjet urgjente mund të ezaurohen në Kolegj me tre gjyqtarë. Zgjedhja e anëtarëve të rinj i jep frymëmarrje gjykatës.
I pyetur lidhur me dosjet e ekstradimit, dy prej të cilave kanë dhe afate ai tha:
Zaganjori: E di që janë dy ekstradime. Kemi njoftuar edhe KLGJ. Çdo gjë varet prej tyre, duhet të avancojnë, duhet të ecin me zgjedhjen e anëtare të rinj.
Më herët kryetarja e KLGJ-së Llagami deklaroi në Komisionin e Ligjeve se në shtator do të kemi emërimet e para në Gjykatën e Lartë.
Aktualisht Gjykata e Lartë ka një stok mbi 30 mijë dosje.
