Trajneri i ekipit të Karabakut, Gurban Gurbanov, doli ditën e sotme në një konferencë për shtyp, rreth 24 orë para ndeshjes së nesërme me Partizanin. 
Tekniku u shpreh se këtu në Shqipëri është një vapë e madhe, dhe se pret që Partizani mund të jetë edhe surprizë me ndryshimet e bëra. Pas konferencës, ekipi doli në fushën e “Selman Stërmasit” për të kryerë stërvitjen e fundit.
NDESHJA – E dimë që do luajmë ndaj një ekipi të vështirë si Partizani, duke parë që edhe vjet patëm një ndeshje të vështirë ndaj një ekipi shqiptar si Kukësi. Do jetë ndeshje e fortë, edhe tifozët janë plot me energji, si vjet me Kukësin.
FAVORIT? – Nuk e ndjejmë veten favorit ndaj Partizanit, jemi në nivele të larta siç është Champions League. Këtu janë ekipe të barabarta.
PËR FITORE QË NDESHJEN E PARË? – Sigurisht që do donim të fitonim, por edhe një barazim do ishte mirë për ne. Edhe nëse mbajmë portën pa pësuar, do na bënte mirë.
KU NDRYSHON PARTIZANI NGA KUKËSI VJET? – Nuk mund të jap një përgjigje të saktë, sepse Partizanin nuk e kam parë akoma në një ndeshje direkt. Do jap përshtypjet pas ndeshjes së parë.
KUJT I DRUHENI, TEMPERATURAVE APO PARTIZANIT? – Sigurisht që është shumë vapë, por nesër na duhet disiplinë dhe ta harrojmë të nxehtin.
PARTIZANI ME SHUMË NDRYSHIME, JU BËN FAVORIT? – Fakti që kanë bërë ndryshime, mund të jetë dhe surprizë për ne.
KARABAKU MË I FORTË APO I DOBËT ME IKJEN E AGOLLIT? – Ansi nuk u largua thjesht nga një ekip, por nga një familje. E ndjejmë shumë mungesën e Ansit, si një pjestar të familjes, jo thjesht si një lojtar.
ELEMINIMI, DO ISHTE DËSHTIM? – Sigurisht që është një humbje për çdo ekip nëse eliminohet në raundin e parë. Edhe nëse humbim, do ecim përpara.
