Nga Boldnews.al
Partia Socialiste nuk ekziston më si subjekt politik, ajo qëndron vetëm si emër, por jo produkt. Më datë 30 qershor nxorri në “ankand” aksionet e saj të fundit, që iu blenë fare lirë nga “Korporata e Rilindjes”, me pronar bossin e madh, (Balokun) Edi Rama.
A ka më socialistë në Partinë Socialiste? Kjo është pyetja që së fundmi ka marrë një përgjigje të trishtë, duke çuar drejt falimentit një subjekt politik që gjithsesi kishte bërë historinë, qoftë edhe me shumë oshilacioni në tranzicionin e stërzgjatur prej tre dekadash në vend. Sot po krijohet “njeriu i ri”, që u poll nga Rilindja e kryeministrit Edi Rama dhe çdo socialist nuk duhet vetëm të ndryshojë ngjyrë, por edhe sjellje.
Në PS-në tradicionale kishte debate brenda llojit, përplasje idesh, nisma të forta, apo grupime intelektualësh, por të gjithë dështuan, kur në krye të saj në vitin 2005 zgjodhën Edi Ramën.
Në Rilindje askush nuk mendon ndryshe nga kryetari. Edhe ata që tentojnë të ruajnë një kredo personale, detyrohen që të ikin, të largohen, në pamundësi për të ndryshuar diçka. Zë kritik as që bëhet fjalë. Rama që nga viti 2005 nuk ka bërë zgjedhje brenda partisë. Në një rast që iu desh të krijonte gjoja zgjedhje sa për procedurë, futi një kandidat fiktiv si Maqo Lakrori, që edhe vetes mezi ja dha votën…
Më pas të gjithë kritikët i hëngri rrugës. Ua mbylli gojën, i la jashtë politikës. Në fillim ndërsente sorollopin e tipit Veliaj, Spiropalë apo Gjiknurët, më pas goditjen finale ua japte vetë, në rolin e një Sulltani që shihte sesi binin në këmbët e tyre kundërshtarët politik, sidomos ata me moral në shoqëri.
Pasi hëngri kokat lart, batërdia zbriti deri në bazë. Nuk ka më socialistë të vjetër që bridhnin shtëpi më shtëpi, fshata më fshat, apo qytet më qytet në parashtrime idesh, mbledhje dhe kontakt të drejtëpërdrejtë me qytetarët mbi problematikat që kishin. Sot ka futur botën virtuale, ku Rilindasit e tij shuan çdo “rracë socialiste” edhe në bazën e saj.
Kishte mbetur vetëm si karakatinë në rënie Partia Socialiste dhe së fundmi edhe atë e rrënoi më 30 qershor, ku u mbajtën votimet moniste. E bleu fare lirë, për ta shkrirë atë që kishte mbetur në pikturën surreale të Rilindjes së tij. Sot në qeveri, parlament, pushtet lokal dhe partinë e drejtuar nga Rama nuk gjen qoftë edhe një njeri të vetëm që të mendojë ndryshe nga kryeministri. I mësuar me idenë që ti shesë dhe fusë të gjithë bashkëpunëtorëve, edhe atyre që e sollën në politikë, Rama krijoi njeriun e ri.
Fillimisht qëmtoi disa përfaqësues të Organizatave Jo Qeveritare, që më vonë i bëri “qeveritarë”. Kudo ka të vetëofruar me tru të shpëlarë nga propaganda dhe Rilindas që u ngjanë grupeve Maoiste të Revolucionit Kulturor Kinez.
Në vend të kulturës tradicionale duhej të dilnin në pah idetë e Maos (diktatorit Mao Ce Dun)… E gjithë Kina në vitet 70’ u mbulua prej revolucionit kulturor me pllakata dhe fletë volante, për të propaganduar kohën e re dhe “njeriun e ri”. Ndërsa sot po dalin në pah idetë e Ramës. Këtë e ka arritur kryeministri ynë, ka krijuar “njeriun e ri” brenda partisë. Aq sa ka ministresha që e quajnë Ramën si “Zot të pushtetit”, si kalorësin e qytetërimit, si Skënderbe, e çdo epitet tjetër “madhështor” që buron nga mendje të lara, shpëlara dhe thara nga propaganda Edviniane…, që po rrëzon edhe idetë Darviniane!
Këtë projekt e shtriu në partinë që drejtoi, po tenton forta ta injektojë edhe në popull, provën e parë e pati më 30 qershor duke marrë përfundimisht edhe ngrehinën e mbetur të PS-së. Fare lirë u shitët socialistë të mirë, Revolucioni Kulturor i Rilindjes krijoi një Mao të ri, nuk kemi më parti, por vetëm një njeri, kryerilindasin që vrau një subjekt politik.
