Një person është vënë në pranga nga policia e Tiranës, pasi akuzohet si shpërndarës kokaine në doza të vogla. Ai është R.M., 22 vjeç, i arrestuar mbrëmjen e djeshme, pasi lëvizte me një Benz tip ML në pronësi të tij, ku iu gjet kokainë.
Janë proceduar penalisht edhe dy persona të tjerë, të cilët ishin me të në makinë. Policia ka sekuestruar një sasi parash, nga një prej pasagjerëve në mjet, ndaj të cilit policia ka ngritur akuzën e pastrimit të produkteve të veprës penale.
Aksioni
Burime zyrtarë nga policia e Tiranës, bënë me dije se, specialistët për Hetimin e Krimit në Komisariatin e Policisë Nr 2, pasi kishin marrë informacion në rrugë operative se një shtetas duke qarkulluar me automjetin e tij shpërndante kokainë në doza të vogla, kanë organizuar dhe finalizuar operacionin policor “Blloku”.
“Si rezultat i operacionit në rrugën ‘Brigada e 8’, nga punonjësit e policisë të Komisariatit të Policisë Nr.2, është ndaluar për për kontroll mjeti tip “Benz” me drejtues shtetasin R.M, dhe me pasagjerë shtetasit A.M. dhe E.P. Gjatë kontrollit në pjesën e brendshme të monitorit të kasetofonit policia gjeti dhe sekuestroi 43 doza me lëndë narkotike të dyshuar kokainë.
Po gjatë kontrollit fizik të shtetasit E.P, policia gjeti dhe sekuestroi në cilësinë e provës materiale një sasi prej 25.500 franga zviceriane, 600 euro, 49.500 lekë dhe 100 dollarë.
Në cilësinë e provës materiale u sekuestrua edhe automjeti në posedim të shtetasit R.M. si dhe 6 telefona celular në posedim të shtetasve të lartpërmendur. Në përfundim të veprimeve të kryera nga Seksioni për Hetimin e Narkotikëve në D. V. P. Tiranë, u bë e mundur arrestimi në flagrancë i shtetasit: R. M., 22 vjeç, banues në Tiranë, për veprën penale ‘Prodhimi dhe shitja e narkotikëve'”, njoftoi Policia.
Si dhe u proceduan penalisht në gjendje të lirë shtetasit: E. P., 32 vjeç, banues në Tiranë, Sauk, për veprat penale “Pastrimi i produkteve të veprës penale ose veprimtarisë kriminale” dhe “Moskallëzim Krimi”; A. M., 32 vjeç, banues në Tiranë, për veprën penale “Moskallëzim Krimi”, shtuan të njëjtat burime.
