Kryetarja e LSI-së Monika Kryemadhi ka ftuar qytetarët ti bashkohen protestës së 10 komëbtare të opozitës, që prej 10 shkurtit.
Përmes një mesazhi në Facebook, ajo shprehet se ky është momenti për t’i dhënë Shqipërisë një shtet me institucione të forta dhe sistem që nuk çimenton kontrollin e individit mbi shtetin por garanton fuqinë e popullit mbi pushtetin.
“Jemi në këtë betejë jo vetëm për zgjidhjen e krizës së momentit, por për t’i dhënë fund kalvarit 30 vjeçar të tranzicionit.
Edi Rama e ka ngritur pushtetin mbi shkatërrimin e institucioneve dhe kapjen e tyre. Më 30 qershor Shqiptarët refuzuan autokracinë, pushtetin e krimit të organizuar, shtetin e grabitjes së taksave të shqiptarëve dhe votimet fake të partisë-shtet.
Shqiptarët meritojnë një qeveri që mban përgjegjësi para popullit, një sistem demokratik funksional që buron nga zgjedhjet e lira e të ndershme, një Atdhe ku të gjithë janë të barabartë para ligjit, me mundësi të barabarta për punësim, mirëqenie, shëndetësi, arsim dhe ku dinjiteti njerëzor nuk nëpërkëmbet.
Ky është momenti për t’i dhënë Shqipërisë një shtet me institucione të forta dhe sistem që nuk çimenton kontrollin e individit mbi shtetin por garanton fuqinë e popullit mbi pushtetin.
Më 8 Korrik të gjithë bashkë për një Shqipëri Evropiane. Asnjë hap pas”, shkruan kryetarja e LSI-së, e cila publikon edhe një video, ku thuhet se “85 e shqiptarëve refuzuan votimet e paligjshme të 30 qershorit“.
Më herët gjatë ditës së sotme, një mesazh e dha edhe kryetari i PD-së Lulzim Basha.
Opozita e bashkuar zhvillon mbrëmjen e së hënës protestën e 10 kombëtare në Tiranë, që prej muajit shkurt. Opozita kërkon largimin e Edi Ramës nga posti i kryeministrit dhe një qeveri tranzitore për të garantuar zgjedhje të lira e të ndershme.
