Autoritetet qipriote kanë mbledhur informacion të nevojshëm për hetimet që kanë të bëjnë me ekzekutimin e biznesmenit Kalopsidioti rreth 2 javë më parë, ku mbetën të vrarë edhe 3 persona të tjerë.
Gjithashtu, nga rezultatet balistike, konfirmohet se në masakrën e ndodhur janë përdorur dy armë. Këto armë janë një kallashnikov dhe një pistoletë. Kjo e fundit është përdorur nga vrasësi shqiptar Jani Vogli, ndërsa kallashnikovi Aleks Burreli, i cili është ende në kërkim.
Jani Vogli është një nga viktimat e atentatit të ndodhur, që në filim u dyshua se u vra nga njëri prej policëve që ishte në tavolinë me biznesmenin, shënjestër për t’u ekzekutuar.
Nga hetimet e deritanishme dhe nga rezultatet balistike, është arritur në përfundim se Jani Vogli me shumë mundësi është qëlluar me kallashnikov nga Aleks Burreli në mënyrë aksidentale, gjatë të shtënave automatike në mënyrë të pakontrolluar.
Kallashnikovi i Aleks Burrelit u gjet nga policia disa metra larg vendit ku ndodhi krimi, ndërsa shqiptari është ende në kërkim. Deri tani janë arrestuar 6 persona, të cilët mendohet se kanë ndihmuar dy shqiptarët të kryenin atentatin si dhe ndihmuan Aleks Burrelin t’i fshihej autoriteteve.
Njëri nga të arrestuarit është bodigardi serb i biznesmenit që u vra, ndaj të cilit ka dyshime të forta se spiunoi punëdhënësin e tij duke u dhënë informacione shqiptarëve.
