Nga Boldnews.al
Krim i rëndë për një gërvishtje makine, një i vrarë shtatë të plagosur. Statistikë…! Asgjë më shumë se kaq. Kjo ndodhi dje në qytetin e Kavajës, sot u harrua. Sërish po merremi me politikë, qeverinë, brekët treçerekshe të kryeministrit, apo galloshet e bashkëshortes së tij. Një popull gjaknxehtë, sedërli deri në sëmundje, nuk ngurron të kapë armët dhe ia zbrazin tjetrit për të vënë në “vend dinjitetin”. Por harrojmë se jemi pa dinjitet, sidomos kur na e merr pushteti, shteti, politika drejtuese.
Ajo makinë e gërvishtur mund të kushtonte një 30 mijë lekë të vjetra për ta riparuar, aq sa qeveria këto para ti rrufit me 33.2 litra karburant, ku vetëm ekcizë, (taksë që e marrin shtetarët), kushon 900 lekë të vjetra litri.
Ty shofer kryevalë, që vrave një kalimtar të rastit, një qytetar të mirë me bukë në dorë, qeveria ta ka rrëmbyer atë 30 mijë lekësh për një rrugë Kosovë që ke bërë. E ti sërish hesht, armë as që bëhet fjalë të nxjerrësh, por as për një protestë nuk të ndihet zëri.
Vrave një qytetarë të pafajshëm plagose disa të tjerë, po të pafajshëm, por një plumb ia dhe edhe kundërshtarit. Sot ti je në burg, vetëm për një ditë qëndrimi në qeli, do paguajmë 60 mijë lekë të vjetra për të të mbajtur ty.
A votove më 30 qershor? Nuk e dimë, por si të kesh votuar si jo, ti dole i humbur, ne të humbur, qeveritarët të fituar. Sepse kanë një qytetar si ti, që mbushin statistikat dhe kur të rjepin çdo ditë me taksa dhe padrejtësi nuk ndihesh. Ama kur bashkëqytetari yt të sheh shtrembër, apo të “lëndon autoveturën”, ti të vret!
Ti ende jeton, ndërsa një burrë 50-vjeçar krejtësisht i pafajshëm, një kalimtar i rastit, që fati i tmerrshëm e kryqëzoi në histerizmin tënd, u nda nga të gjallët prej plumbave të tu, duke lëshuar dy bukë në tokë. Ai ishte qytetar i mirë, pa iu ndjerë zëri. Edhe ai duronte dhunën e pushtetit, të qeverisë që është, e atyre që ikën, ndoshta edhe atyre që do të vijnë, por nuk të vriste për një fjalë goje, nuk kapte armët për esktetikën e makinës.
Për pushtetin ti dhe ai që iku jeni njësoj, për ne (shumicën qytetare) nuk jeni të tillë. Ndokush i sërës tënde mund të të “justifikojë” në marrëzinë tënde. “Kushedi ka qenë i nervozuar do të thonë, ku i dihet halli tjetrit, mbase ka qenë në ndonjë zyrë shteti dhe e përzunë pa i mbaruar punë. Mund të ketë pasur problemin e ndonjë prone, por në Hipotekë një zyrtaruc Rilindje i bëri të fortin, pa i dhënë të drejtën”… E ky tip, fort i nxehur, ia zbrazi armën grupit tjetër rival, por mori jetën e një qytetari pa faj. Statistikë!
Vdiq një qytetar, por jeton pushteti. Ai që na merr frymën çdo ditë, me dhe pa takt. Që na merr taksat për arsim dhe nuk arsimon këtë brez të ri që të vret për një fjalë gojë. Jeton pushteti që na zu frymën mee tarifat e shtuara të shërbimit, abuzime dhe korrupsion, por nuk mendon si të hapë vende pune, e ku i ri që vret kot të ishte në punë, jo rrugëve me kallshnikov. Jeto pushtet, qeveri, drejtësi sa për emër. Ne jemi statistikë, jo qenie dinjitoze, pushtetet kështu na gatuan, kështu na duan!