Një person humbi jetën dhe 7 të tjerë u plagosën si pasojë e një përplasjeje me armë mes dy grupeve kriminale. Ngjarja e rëndë ka ndodhur në hyrje të qytetit të Kavajës, ndërsa viktima është identifikuar si Ramazan Hasalliu, 50 vjeç.
Mësohet se Hasalliu ka qenë një kalimtar i rastit dhe s’ka pasur lidhje me ngjarjen. Madje nga raportimet mësohet se ai ka qenë pranë një furre për të blerë bukë.
Ndërkohë edhe 5 të plagosyr të tjerë, 3 prej të cilëve tashmë të identifikuar Sali Mekja, Rrustem Dedja dhe Arben Hajdini, raportohet se kanë qenë kalimtarë të rastit dhe s’kanë asnjë lidhje me ngjarjen.
Menjëherë pas masakrës, policia njoftoi ndalimin e dy personave që mësohet se janë vëllezërit Eraldo dhe Elio Hyka. Njëri prej tyre raportohet se është pjesëmarrës direkt në ngjarje, duke qëlluar me armë, ndërsa nuk dihen emrat e personave të tjerë.
Policia ka nisur kontrollet dhe hetimet mbi ngjarjen e rëndë, që ka tronditur qytetin.
