Kreu demokrat Lulzim Basha është shprehur optimist sot para anëtarëve të Kryesisë dhe ish-deputetëve lidhur me finalizimin e aksionit opozitar.
Në mbledhjen e zhvilluar në selinë e PD-së, Basha mësohet të ketë kërkuar angazhimin e të gjithë anëtarëve të këtyre forumeve lidhur me komunikimin me qytetarët, ndërsa është shprehur se paralelisht do të vijojë komunikimi edhe me ndërkombëtarët.
Referuar bojkotit masiv të 30 qershorit nga shqiptarët, Basha mësohet të jetë shprehur se ky mesazh duhet të lexohet qartë dhe opozita duhet të vijojë aksionin e saj në mbrojtje të demokracisë.
“Nuk do të ketë pushime për ne, por as për kundërshtarin”, mësohet të jetë shprehur kreu demokrat, që gjithashtu ka kërkuar angazhim maksimal për përgatitjen e protestës së 8 korrikut, që do të mbahet para Kryeministrisë.
Burime nga PD shprehen se Basha kërkoi nga ish-deputetët dhe anëtarët e kryesisë që të koordinohen me partitë aleate, sikundër të vijojnë kontaktet me qytetarët sipas zonave ku janë deleguar me qëllim sqarimin e plotë të tyre dhe qartësimin se aksioni opozitar nuk do të ndërpritet deri në realizimin e kërkesës për largimin e Edi Ramës nga posti i kryeministrit.
