Rahul Gandhi ka dhënë dorëheqje nga posti i kryetarit të partisë kryesore opozitare në Indi, “Kongresi”, duke i dhënë fund disa javëve të spekulimeve.
Në letrën e dorëheqjes, të cilën e publikoi të mërkurën në “Twitter”, ai e mori përgjegjësinë për humbjen e partisë së tij në zgjedhjet e kaluara parlamentare. Ai edhe më parë kishte paralajmëruar se do të japë dorëheqje, por udhëheqësit e kësaj partie kishin shpresuar se do t’ia ndryshonin mendjen për këtë vendim.
Ai shtoi se ndonëse nuk ndien urrejtje apo zemërim për partinë “Bharatiya Janata”, e cila është tash për tash në pushtet, secila qelizë në trupin e tij i reziston idesë së tyre për ndërtimin e Indisë, sepse, siç tha ai, ajo është e bazuar në dallime dhe urrejtje.
Ghandi gjithashtu e vuri në pikëpyetje paanësinë gjatë procesit zgjedhor, duke thënë se ai dhe partia e tij nuk kanë luftuar ndaj një partie tjetër, por ndaj tërë makinerisë së shtetit indian.
Partia e kryeministrit Narendra Modi shënoi fitore bindëse në zgjedhjet e përgjithshme, ndonëse kundërshtarët politikë dhe analistët kishin pritur që gara të ishte shumë më e ngushtë, shkruan “BBC”.
