Kuvendi vijon normalisht procedurat për shkarkimin e Presidentit Ilir Meta.
Taulant Balla, kreu i Grupit Parlamentar të PS-së, tha se kërkesa u shqyrtua nga Komisioni i Ligjeve dhe se raporti i Komisionit do shkojë në seancën plenare për tu ngritur edhe Komisioni Hetimor që do vlerësojë sjelljen e presidentit.
Ai shtoi se Komisioni Hetimor do të përbëhet nga anëtarët e tre grupeve parlamentare.
Ndërsa theksoi se çdo ditë e më shumë po bëhet e domosdoshme lirimi i zyrës së Presidentit.
“Jemi në fazën kur është shqyrtuar nga Komisioni i Çështjeve të Ligjeve nisma e depozituar nga 55 anëtarë të Kuvendit për shkarkimin e Presidentit Ilir Meta.
Në këtë fazë të këtij procesi, raportoi i shkon seancës plenare. Sipas rregullores, Kuvendi diskuton në seancën plenare raportin e Komisionit të Ligjeve.
Nëse raportoi miratohet proceduara vijon më tej, duke u ngritur Komisioni Hetimor për evidentimin e shkeljeve nga ana e Presidentit dhe më pas Komisioni Hetimor paraqet në Kuvend raportim përfundimtar, i cili në rast se merr mbështetjen e 94 apo më shumë deputetëve miraton shkarkimin Presidentit dhe më pas e certifikimin e bën Gjykata Kushtetuese”, tha Balla.
