Përgatitjet e Partizanit për fazën përgatitore në Slloveni po shkojnë drejt fundit, por e tillë nuk mund të konsiderohet puna për plotësimin e grupit para turit të parë të Champions-it, ku përballë do të kenë kampionët e Azerbajxhanit. Kur kanë mbetur edhe 8 ditë nga ndeshja e parë me Karabakun, takim i cili do të luhet më 10 korrik, ora 17:30, në stadiumin “Selman Stërmasi”, skuadra e trajnerit Franko Lerda mbetet e zbuluar para Champions-it.
Edhe në këtë prag sezoni të kuqtë po vuajnë problemin në majë të sulmit, pasi drejtuesit akoma nuk e kanë gjetur bomberin e shumëpritur. Lëvizjet e fundit kanë bërë që ekipi të mos jetë i sigurt as në fazën mbrojtëse, probleme të cilat kanë dalë në pah në dy miqësoret e zhvilluara në Slloveni.
Mungesa e “pykës” – Që nga largimi i Kaleb Ekubanit dhe deri më sot Partizani po e vuan mungesën e një bomberi. Edhe italo-ganezi nuk ishte “pykë” e mirëfilltë, por u përshtat me sukses te Partizani në sezonin 2016-2017, gjë e cila nuk ka ndodhur me pasuesit e tij. Sikur të mos mjaftonte mosafrimi në kohë i një qendërsulmuesi, ndaj Karabakut Partizani do të vuajë edhe mosgatishmërinë e Jurgen Bardhit, i cili vjet ka luajtur në majë.
Bardhi vuan nga një shqetësim i vjetër, probleme me rrënxat e kofshëve dhe gjatë fazës në Slloveni më shumë është përgatitur i diferencuar. 21-vjeçari po vjen drejt rikuperimit të plotë, por nuk pritet të jetë gati për ndeshjen e 10 korrikut me Karabakun. Në kushtet aktuale, trajneri Lerda gjatë përgatitjeve në Slloveni ka provuar Mensah dhe Çinarin si “pykë”. Gjasat për ta bërë këtë rol më shumë i ka ganezi.
Qendra e mbrojtjes – Me largimin e Sodiq Atandës, por edhe me Egzon Belicën jo 100% të konfirmuar për të rinovuar, mbrojtja e Partizanit e ka humbur epitetin “bunker”. Dy miqësoret e humbura në Slloveni, ku Sarajevo i mundi 5-1 dhe Mura 2-1, mbrojtja, kryesisht qendra, ka shfaqur probleme të dukshme, gjë e cila e rrit pasigurinë para Karabakut. Në dy testet e luajtura trajneri Lerda ka provuar në qendër të mbrojtës Belicën me Bitrin, i rikthyer nga huazimi te Kamza, por edhe Rexhepin dhe boshnjakun e ardhur për provë, Muamer Adzem. Edhe në të djathtë të mbrojtjes, të kuqtë nuk shikohen të kompletuar, ku alternativë për Ibrahimin po përshtatin 19-vjeçarin Besnik Ferati.
Gjejnë vetëm mesfushorë – Bilanci i merkatove të zhvilluara te Partizani në sezonet e fundit tregon se drejtuesit e kuq dinë të godasin në shenjë vetëm për mesfushorë, kryesisht shkatërrues, si dhe gjysmësulmues. Ndërsa, për mbrojtës dhe qendërsulmues, me sa duket, drejtuesit nuk e kanë nuhatjen e duhur. Ndaj, shpeshherë në merkato te “demat” ka ndodhur që për të mbushur planin, në mungesë të mbrojtësve dhe sulmuesve të duhur afrojnë mesfushorë me shumicë.
