Kreu demokrat Lulzim Basha është takuar sot me 15 kryebashkiakët përfaqësues të opozitës. Dy ditë pas votimeve të 30 qershorit, Basha ka thirrur në një takim kryetarët e bashkive, me të cilët ka diskutuar mbi strategjinë e re që do të përdorë opozita në ditët në vijim.
Mandati i kryebashkiakëve përfundon në 12 gusht, datë kur të mandatuarit e rinj, duhet të nisin detyrën.
Por duket se vendimi që kanë marrë kryetarët e bashkive është të mos dalin nga zyra dhe këtë e lidhin pikërisht me parregullsitë në procesin e votimeve, por edhe paligjshmërinë e procesit të 30 qershorit.
Voltana Ademi, kryetare e Bashkisë së Shkodrës, tha për mediat se do të presë raportin e OSBE/ODIHR për të vendosur se çfarë do të bëjë, pra nëse duhet të dorëzojë ose jo detyrën e saj.
“Jemi akoma herët për ta diskutuar këtë. Mendoj që raporti që OSBE/ODIHR është një reflektim për popullin shqiptar. Do të shohim zhvillimet jo vetëm të klasës politike, por edhe të njerëzve. Ajo që u tha të dielën është reagimi më i madh popullor që shqiptarët mund të kenë bërë në historinë e vet”, tha Ademi.
Sipas saj, situata është shumë e rëndë, ndaj duhet reagim i gjithë njerëzve.
“Situata është shumë e rëndë, e rëndë për të gjithë popullin dhe në këtë kontekst politikisht, por bashkë me gjithë njerëzit do të duhet të reagojmë dhe ta bëjmë të mundur”, shtoi ajo.
Ndërkohë, Xhelal Mziu, kryetari i Bashkisë së Kamzës, u shpreh i prerë se nuk ka ndërmend të dorëzojë detyrën, pasi procesi i 30 qershorit ishte një farsë dhe i paligjshëm.
Në fakt të gjithë kryetarët e bashkive që pretendojnë se kanë fituar më 30 qershor janë votuar nga 10 apo 15 përqind e numrit të zgjedhësve me të drejtë vote, çka vë në dyshim gjithë procesin.
