Nuk kanë dhënë asnjë rezultat, deri në këto momente, kërkimet në ujërat e liqenit të Comos, në veri të Italisë, për gjetjen e trupit të futbollistes me origjinë shqiptare, Florijana Ismaili, 24 vjeçe, pjesë e përfaqësueses së Zvicrës, e cila u zhduk të shtunën pas një zhytjeje në Musso, në zonën e Alto Lario.
Këtë të hënë, polumbarët do të kenë në dispozicion edhe një pajisje robot, që mund të zhytet deri në fund të liqenit.
Florijana Ismaili kishte dalë shëtitje me një varkë, bashkë me një mikeshën e saj, ndërsa tragjedia ndodhi pasdite, pak para se të kthenin varkën.
Një zhytje thuajse 100 metra nga bregu rezultoi fatale, pasi futbollistja nuk doli më në sipërfaqe.