Vjen reagimi nga PD pasi KQZ–ja shpalli se pjesëmarrja në votime deri në orën 11 ishte 12%.
Ish-deputetja e PD-së Jorida Tabaku shprehet se kjo është një ‘gënjeshtër e trashë’.
“Sipas KQZ pjesëmarrja në orën 10, është 12%, ekzaktësisht sa në 2017, siç tregon dhe vetë faqja e KQZ. Gënjejnë dhe trashë, dhe kur numërojnë vetë, votojnë vetë, përsëri kanë nevojë të gënjejnë! Këtë përqindje e ka pasur vendi kur kandidonin dy aleanca të mëdha dhe një parti e tretë.
Këto nuk janë zgjedhje as votime. Punëtorë të administratës të detyruar për të shkuar në votime për të mos humbur vendin e punës!
Farsa vazhdon dhe do të jetë edhe më qesharake kur të na paraqesin një realitet tjetër. Shqiptarët po bojkotojnë ndërsa mazhoranca vazhdon të prodhojnë shifra nga fabrika e propagandës”, shprehet ajo.
