Një tjetër incident është regjistruar në votimet e sotme. Raportohet se në bashkinë e Durrësit, më konkretisht në një qendër votimi në Katundin e Ri është thyer kutia e votimit.
Nuk dihen rrethanat e këtij incidenti, por raportohet se për këtë shkak është bllokuar procesi i votimit në këtë qendër.
Ndërkohë, PD e Durrësit denoncon dhunimin e një fëmijë të mitur pranë një qendre votimi në zonën e Katundit të Ri.
PD publikon edhe foton e fëmijës dhe deklaron se ai është goditur nga kreu i njësisë administrative të Katundit të ri, Shaban Tafa, që i përket PS.
Por nga ana tjetër, Tafa në një komunikim telefonik thotë se ai ka parë dy fëmijë që donin t’i vinin zjarrin një qendre votimi dhe ai I ka larguar. Në këtë moment është sulmuar dhe goditur nga simpatizantë të PD-së, shkruan Durresilajm.
Sipas Tafës, qëllimi i ndërhyrjes së tij ishte largimi i fëmijëve nga qendra e votimit.
