Komisioni Qendror i Zgjedhjeve ka diskutuar sot për dekretin e Presidentit Meta që cakton datën 13 tetor si datë zgjedhjesh vendore. Seanca është shoqëruar me debate mes kryetarit Klement Zguri dhe nënkryetarit Denar Biba.
Sipas këtij të fundit ky dekret nuk mund të pranohet sepse nuk është pranuar as ai që anulon datën 30 qershor. Ai përmendi gjithashtu vendimin e Kolegjit Zgjedhor, të cilët vendosën të rrëzojnë kërkesën e Idajet Beqirit, kryetarit të Partisë Uniteti Kombëtar për tu çregjistruar nga zgjedhjet dhe duke i hapur kështu rrugën zgjedhjeve më 30 qershor.
“Presidenti është që të dekretojë dhe jo të anulojë zgjedhje. Dekreti i tij është antikushtetues dhe nuk ka peshë juridike” ka thënë Biba.
Nga ana tjetër kryetari Zguri i kërkoi anëtarëve të KQZ të pranonin dekretin e presidentit. Sipas tij fakti që dekreti është botuar në fletoren zyrtare e bën atë të detyrueshëm për tu zbatuar dhe jo objekt interpretimi. Detyrimi i KQZ tha ai është të qartësojë zgjedhësit dhe të mos krijojë më keqkuptime që vijnë nga politika.
“Jemi në një situatë absurdi. Nisur edhe nga kolegët, ministria e Drejtësisë ka gjykuar që të vendos në fletoren zyrtare. Që do të thotë se është e ligjshme. Dekreti ka dy orë që ka dal. Nuk u trajtua në gjykata. Kemi një tension kritik që kurrë nuk ka qenë. Lufta politike nuk ka bërë as më shumë as më pak por ka çoroditur votuesit shqiptarë. Kemi detyrim për të qartësuar zgjedhësit. Pa tensione dhe keqkuptime që vijnë nga politika. Në funksion të detyrimeve tona do tu bëj një thirrje kolegëve për të pranuar dekretin e presidentit për zgjedhjet. Është thirrje e sinqertë ” tha Zguri.
Anëtarët e KQZ ranë dakort që dekreti i Metës të shqyrtohet në një moment të dytë. Megjithatë sipas Denar Bibës kjo do të mbetet një procedurë formale pasi dekreti është ‘nul’.
